Според бројките најтешка е ситуацијата во Источна Европа. Секојдневно се уриваат рекорди во бројот на заразени и на починати
Додека неколку земји ги релаксираат мерките за борба против пандемијата со ковид-19, голем дел од светот се подготвува за петтиот бран на пандемијата. Поради ниското ниво на вакцинација, пред се во сиромашните земји, пандемијата ќе продолжи во текот на цела 2022 година, предупреди денеска Светската здравствена организација.
Според бројките најтешка е ситуацијата во Источна Европа. Секојдневно се уриваат рекорди во бројот на заразени и на починати. Од денеска во соседна Бугарија е воведен задолжителен зелен сертификат за влез во сите затворени јавни простори.
Романија на 25 октомври воведува нови ограничувања – сертификати за ковид и задолжителна вакцинација за сите ученици.
„Почитувани Романци, ако сакате да ставите крај на оваа пандемија, вакцинирајте се! Ако не сакате да одите во болница и да не завршите на интензивна нега, вакцинирајте се! Немојте да мислите дека ве лажеме колку е опасен овој вирус, за да мора да се вакцинирате“,
рече претседателот на Романија, Клаус Јоханис во обраќањето.
Летонија започна едномесечен карантин, со кој властите на оваа балтичка држава се обидуваат да го потиснат новиот бран на инфекција со коронавирус. Ќе работат само некои продавници за храна и аптеки, од 8 до 17 часот.
Русија пријави неколку инфекции со нова варијанта на ковид-19, оззначена како AY.4.2, за која се верува дека е повеќе заразна од делта-сојот.
Светската здравствена организација предупреди дека поради ниската стапка на имунизација во сиромашните земји, пандемијата на коронавирус ќе продолжи во текот на 2022 година.
„Видовме неверојатно убедливи податоци од земји со висок процент на вакцинирани. Но, можам да ви кажам дека не сме на добар пат. Дали навистина треба да го забрзаме процесот? Оваа пандемија ќе трае една година подолго отколку што е потребно“,
рече Брус Ејворд, советник на СЗО.
И додека пандемијата се смирува во Јапонија и Индија, кои произведоа милијарда дози од својата вакцина, и никој не зборува за Кина како загрозена област, Нов Зеланд станува ново жариште, а во Бразил, иако нема повеќе бранови на инфекција, зголемувањето на бројот на случаи е постојано.