ВМРО-ДПМНЕ обвини дека власта дава лажни ветувања за изградба на брана, а ги нема регулирано имотно-правните односи за земјиштето. Бочварски пак, вели дека експропријацијата не е завршена само за одреден дел, кој ќе биде регулиран во наредните две и пол години
Почна изградбата на брана на река Отиња, која според најавите од надлежните треба да е готова во наредните две и пол години.
Стартот на градбата официјално денеска го означија премиерот Зоран Заев, вицепремиерот, Љупчо Николвски, министерот за транспорт и врски, Благој Бочварски и градоначалникот на Општина Штип, Сашко Николов.
„За само две и пол години општината направи подвиг за реализација на проект заглавен во процедури децении наназад. Општината го подготви основниот проект со изработка, ревизија, студија за оценка на влијанието на животната средина, изработен и усвоен Детален урбанистички план, како и позитивно мислење од Институтот за земјотресно инжинерство и инжињерска сеизмологија. Потоа следеше и тендерската постапка од страна на Министерството“,
рече Заев.
Вредноста на овој проект е 306 милиони денари, а средствата се обезбедени од Буџетот на Министерството за транспорт и врски за период 2021-2023 година.
Со проектот е предвидено да се изведе камено земјена брана со централно глинено јадро со висина од 33 метри.
„Придобивките од оваа инвестиција се огромни, се бројни. Браната на река Отиња на Штип ќе му донесе промена на климата, заштита од градот, од поплави, но и место за рекреација. Ќе се намалат високите летни температури, но и ќе влијае и на зголемување на зимските температури. Дополнително се создава биолошки минимум во коритото на реката Отиња, а ќе се користи и за наводнување на зелените пворшини. Ова ќе биде место за рекреација на штипјани, но и на сите наши граѓани во државата. Ќе биде можност за еден развој на градот во наредните години и децении“,
рече Заев.
Од ВМРО-ДПМНЕ пак, веднаш реагираа со соопштение до јавноста, обвинувајќи дека власта ветува брана, а нема извршено експропријација на земјиштето.
„Власта се уште ги нема решено имотно – правните односи. Експропријација на земјиштето сѐ уште нема. Дали и овој проект треба да заврши како незавршената пруга кон Бугарија? Граѓаните од Штип, сопственици на имот во месноста каде ќе се протега браната, сѐ уште никој не ги контактирал, да ги извести дека на нивниот имот треба да се изгради брана и вештачка акумулација. Ова единствено асоцира на узурпација на приватен имот од страна на државата. Наместо само сликање пред ископи Заев, Бочварски и Николов да објаснат на засегнатите граѓани – кој ќе ги обештети?“,
порачаа од ВМРО-ДПМНЕ во соопштение до јавноста.
На новинарско прашање до каде е процесот на експропријација, министерот Бочварски рече дека на делот каде што се гради браната процесот е завршен, дека во делот каде по изградбата треба да се полни, не е. Сепак, уверува дека во наредните две и пол години министерството и општината ќе ја завршат и оваа постапка.