Во тек е седницата на Централниот одбор на СДСМ во „Холидеј Ин“, на која треба да се потврдат кадровски решенија на социјалдемократите во новaта влада.
Претходно денеска, портпаролката на СДСМ, Богданка Кузеска, навести дека централниот одбор на партијата ќе го потврди договорот за коалиција, кој вчера го постигнаа Зоран Заев и Али Ахмети.
„Договорот на коалицијата ‘Можеме’, предводена од СДСМ, како и ДУИ, ќе биде изгласан од Централниот одбор и секако ќе се донесат одлуки и за кадровските решенија“
кажа портпаролката Кузеска, одговарајќи на новинарско прашање денеска.
ДУИ веќе излезе со информации за своите кадри. Артан Груби ќе биде прв вицепремиер и министер за политички систем, Бујар Османи ќе биде министер за надворешни работи, Фатмир Бесими ќе раководи со ресорот финансии, Крешник Бектеши останува прв човек на економија, а министер за животна средина ќе биде Насер Нуредини.
Ова го соопшти лидерот на ДУИ, Али Ахмети по состанокот на Централниот совет на партијата што се одржа попладнево во Тетово.
Останува, како што изјави Ахмети, со коалициските партнери да се договорат уште за министер во Министертвото за информатичко општество, а утре ќе биде избран претседателот на Собранието, Талат Џафери.
Како што објавивме претходно, oд редовите на СДСМ во новата влада на министерски позиции ќе бидат:
Љупчо Николовски – вицепремиер
Фатмир Битиќи – вицепремиер за економија
Никола Димитров – вицепремиер за европски прашања
Оливер Спасовски – министер за внатрешни работи
Радмила Шекеринска – министерка за одбрана
Венко Филипче – министер за здравство
Мила Царовска – министерка за образование и наука
Бојан Маричиќ – министер за правда
Благој Бочварски – министер за транспорт и врски
Јахода Шахпаска – министерка за труд и социјална политика
Ирена Стефоска – министерка за култура
Предизборниот коалиционен партнер на СДСМ, партијата БЕСА, го добива ресорот земјоделство, каде влегува Аријанит Хоџа, а Горан Милевски од ЛДП останува министер за локална самоуправа.