„Формиравме стручна комисија да ги испита сите детали за овој случај. Докторите одлучиле тој конзервативно да се третира. За жал, не знаеме што се случило и зошто настапила смрт кај пациентот и зошто семејството не дозволило да се направи обдукција, бидејќи е констатирано дека тој има и други здравствени проблеми, не само аневризма на аортата“, рече министерот за здравство, коментирајќи го овој случај
Починатиот пациент бил примен на Кардиохирургија, докторите одлучиле тој да се лекува конзервативно, а не да биде подложен на оперативен зафат, рече денеска на прес-конференција министерот за здравство Арбен Таравари, одговарајќи на новинарско прашање за коментар на случајот, но и на извештајот од Државниот санитарен и здравствен инспекторат (ДСЗИ), од каде се иницира формирање комисија за стручен надзор во делот на работењето на здравствените работници.
„Формиравме стручна комисија да ги испита сите детали за овој случај. Докторите одлучиле тој конзервативно да се третира. За жал, не знаеме што се случило и зошто настапила смрт кај пациентот и зошто семејството не дозволило да се направи обдукција, бидејќи е констатирано дека тој има и други здравствени проблеми, не само аневризма на аортата“,
рече тој.
За набавката на апаратот за ангиографија на Кардиохирургија и зошто досега не бил ставен во функција. министерот рече дека секогаш се бара клиниките да посочат каков апарат бараат, а во случајот е одлучено да се набави апарат кој истовремено е и за компјутерска томографија и ангиогаф.
„Вистина е дека побарале да биде поставен на шини за да биде посигурен. Со тоа, сме се осигуриле. И веќе е инсталиран“,
кажа министерот.
Таравари не сака да ги коментира приватните болници, каде евентуално требало да биде однесен сега починатиот пациент, но додаде дека било разговарано со нив, но дека пациентот имал и друг здравствен проблем.
Таравари вчера изјави дека ќе се бара одговорност доколку имало пропуст или грешка за пациентот Т.А. од Скопје, кој почина на Клиниката за кардиохирургија.
Од Социјалдемократскиот сојуз (СДСМ) побараа оставка од Таравари, посочувајќи дека пациентот починал зашто на државната клиника не можела да му се изведе потребната итна интервенција, поради нефункционалност на здравствениот систем.
Според извештајот на ДСЗИ, Клиниката за Кардиохирургија во моментот кога бил згрижен пациентот имала недостаток на стентови за таква интервенција, а ангиографската сала во која се изведуваат такви интервенции е во градежен зафат заради поставување компјутер.
Како може државна болница, прашуваат од опозицијата, да нема основи услови за спас на човечки животи.