Поранешниот пратеник и политичар Амди Бајрам утрово почина на 64-годишна возраст.
Лидерот на Сојузот на Ромите, кој имаше проблеми со срцето бил донесен починат во болницата „Жан Митрев“, потврдија за Фокус од болницата. Посмртно ќе му биде направен и тест за ковид 19, за што му е земен брис.
Тој минатата недела беше во фокус на јавноста, откако во Истанбул направи свадба за внуката со над 200 гости од Македонија.
Инаку, во Собранието влезе во 1994 како член на Партија за целосна еманципација на Ромите, за до крајот на мандатот да остане независен пратеник.
Од 1998 до 2002 година ја поддржуваше владата на ВМРО-ДПМНЕ предводена од премиерот Љубчо Георгиевски.
Во 2004 беше обвинет за кражба на платно од штипската фабрика „Македонка“ вредно 750 илјади евра. Првично беше осуден на 7-годишна казна затвор, а потоа казната му беше намалена на 4 години. Во 2005 година победи на локалните избори, но како градоначалник на Шуто Оризари беше нецец месец, бидејќи замина на издржување на затворската казна во затворот во Штип.
Во 2007 казната му е намалена за шест месеци од претседателот Црвенковски, а во 2008 излезе од затвор.
Потоа влезе во коалиција со ВМРО-ДПМНЕ предводена од премиерот Никола Груевски. Откако партијата замина во опозиција по парламентарните избори во 2016, тој премина во коалиција со СДСМ.
Сојузот на Ромите го избра и за кандидат за претседател на Македонија на последните претседателски избори, но не го собра потребниот број потписи за да се кандидира.