Во вчерашната престрелка во црногорскиот град Цетиње единаесет лица беа убиени, а шестмина беа повредени
Едно лице од ранетите во вчерашната престрелка во Цетиње е во животна опасност, соопштија денеска од Клиничкиот центар на Црна Гора. Во таа болница во Подгорица се згрижени четири лица кои се ранети – едно е стабилно, а тројца се на интензивна нега, од кои едно е во животна опасност.
Во соопштението се наведува дека двајца пациенти се надвор од животна опасност и се згрижени во болница во Цетиње, јавуваат црногорски медиуми.
Еден од хоспитализираните во Клиничкиот центар на Црна Гора во моментов е стабилен, надвор од животна опасност и е сместен на Клиниката за неврохирургија.
„Вториот пациент е третиран хируршки по приемот, има повреди на мозочните структури и коскените структури на главата и градниот кош, животот му е загрозен и се наоѓа на Централното одделение за интензивна нега“,
велат од Клиничкиот центар на Црна Гора
Во соопштението се додава дека третиот пациент има повреда во пределот на абдоменот, хируршки е третиран и е на понатамошна интензивна терапија и мониторинг и исто така е сместен на одделението за интензивна нега.
„Четвртиот пациент има повреди на вратот и градниот кош, отворена фрактура на десната надлактица, исто така е оперативно третиран и сè уште бара лекување на одделението за интензивна нега“,
соопшти Клиничкиот центар на Црна Гора.
Во вчерашната престрелка во црногорскиот град Цетиње единаесет лица беа убиени и шестмина беа повредени, а убиен беше и напаѓачот.