ВМРО-ДПМНЕ е многу повисоко ниво, кога се среќава со претставници на ЕУ, односно со првите луѓе на државите каде што одиме, вели потпретседателот на опозициската партија
Александар Николоски, потпретседател на ВМРО-ДПМНЕ, вели дека не памти дека лидер на СДСМ, додека партијата беше во опозиција, се сретнал со премиер на земја членка на ЕУ, како што тоа беше случај во изминатите неколку дена, кога лидерот на ВМРО-ДПМНЕ Христијан Мицкоски беше во посета на Унгарија, Словенија и Хрватска и се сретна со премиерите и лидери на партии од ЕПП: Виктор Орбан, Јанез Јанша и Андреј Пленковиќ.
„Јас не можам да се сетам дека кој било претставник на СДСМ, додека беа во опозиција, се видел со премиер на која било земја членка на ЕУ. Немаше таков пример, што значи дека нивото е многу различно. ВМРО-ДПМНЕ е многу повисоко ниво, кога се среќава со претставници на ЕУ, односно со првите луѓе на државите каде што одиме. И ќе ја потсетам јавноста дека кога СДСМ остваруваше средби, тоа беше едно класично кодошење на штета на државата”,
рече Николоски во гостување на вестите на Сител.
Николоски најави нова турнеја на Мицкоски низ земји членки на ЕУ напролет и, како што рече, понатамошно лобирање и презентирање на ставовите на ВМРО-ДПМНЕ за деблокада на процесот на интеграција на земјава во ЕУ. На прашање како влијаат на тој процес критиките за власта во земјава што опозицијата ги изнесува при посетите во странство, Николоски рече дека државниците со кои имаат средби имаат свои амбасади во Скопје и дека се добро информирани за случувањата тука.
„Луѓето со кои се гледаме се први луѓе на нивните држави и верувајте се исклучително добро информирани. Имаат и свои амбасади тука и знаат и повеќе од што ќе им кажете. На пример, се случуваше да ја почнеме реченицата и тие да ја довршат. Еве ќе кажам два примери без имиња. Кога зборувавме за блокадата од Бугарија зборувавме дека во одреден период Заев беше подготвен да попушти се во даден момент и еден соговорник вели – ‘а знам за интервјуто на Заев’. Или кога зборуваме за корупција, друг соговорник вели – ‘а, да,знам дека братот на премиерот е во бизнис’,
рече Николски.