Анѓушев беше на чело на конзулатот на Малта во Скопје од октомври 2021 година по одобрение од владата на Малта. „Тајмс оф Малта“ пренесува изјава од портпаролот на тамошното Министерство за надворешни работи кој вели дека никогаш не добиле никакви негативни информации за Анѓушев од неговото назначување во 2021 година
Поранешниот вицепремиер Кочо Анѓушев веќе не е почесен конзул на Малта. Оваа функција, на која беше именуван во 2021 година, му е прекината од страна на Министерството за надворешни работи на Малта веднаш по обелоденувањето на информацијата дека тој е ставен на „црната листа“ на САД, јави „Дојче веле“.
Анѓушев беше на чело на конзулатот на Малта во Скопје од октомври 2021 година по одобрение од владата на Малта. „Тајмс оф Малта“ пренесува изјава од портпаролот на тамошното Министерство за надворешни работи кој вели дека никогаш не добиле никакви негативни информации за Анѓушев од неговото назначување во 2021 година.
„Со оглед на ваквите случувања, Министерството го прекинува неговото назначување со непосреден ефект и внимателно ги следи најновите случувања“,
додава тој.
Анѓушев, како почесен конзул на Малта, на маргините на Самитот на ОБСЕ, на 3 декември, се сретна со министерот за надворешни и европски работи и трговија на Малта, Јан Борг, идниот претседавач со Организацијата.
Информацијата ја објави „Феро инвест“ на својата официјална фејсбук-страница.
На состанокот, како што информираа од компанијата, се разговарало за ситуацијата во регионот во светло на идното проширување на ЕУ, за геополитичките случувања во Европа и пошироко, како и за можностите за економска соработка меѓу двете земји. На средбата станало збор и за организацијата на состанокот на почесните конзули на Малта, кој ќе се одржи во февруари 2024 година во Валета.
Бизнисменот и поранешен вицепремиер Кочо Анѓушев пред два дена се најде на американската „црна листа“ поради „неговата вмешаност во значителна корупција“. Одлуката беше објавена на веб-страницата на американскиот Стејт департмент.
„Соединетите Држави го означуваат Кочо Анѓушев, поранешен вицепремиер на Северна Македонија, како генерално неподобен за влез во Соединетите Држави поради неговата вмешаност во значителна корупција. Додека ја извршуваше функцијата вицепремиер, Анѓушев ја злоупотреби својата службена положба во корист на неговите приватни деловни интереси и ја поткопа довербата на јавноста во Северна Македонија во владините институции и јавни процеси“,
се наведува во одлуката.
Освен на Анѓушев, забранет им е влез во САД и на неговата сопруга Елизабета, и на нивните деца Ангел и Огнен.
Анѓушев, пак, ги негираше сите сомневања на Стејт департментот и најави жалба на одлуката.
Во реакцијата тој посочи дека во текот на неговиот мандат во Владата на Република Северна Македонија од 2017 до 2020 работел со целосно почитување на сите закони и уставни одредби на државата и во интерес на македонската економија и на демократските принципи.
„Јас имам фирми во Велика Британија, Германија, Холандија и во САД, и сум американски даночен обврзник, односно јас плаќам данок во Соединетите Американски Држави и сум партнер и соработник со значајни економски субјекти и личности во САД“,
вели тој меѓу другото во реакцијата.