Под слоганот „Марш на ангелите“, семејствата на загинатите во текот на денот изразија протест пред институциите, барајќи правда за своите најблиски кои загинаа во пожарот
По средбата со министерот за внатрешни работи Панче Тошковски во просториите на министерството, заврши речиси целодневниот протестен марш на семејствата на трагично загинатите во пожарот во Кочани.
Тошковски изрази уверување дека мора да има правда за овој случај во кој, како што рече, меѓу другите, досега се осомничени и актуелен министер, актуелен директор на Дирекцијата за заштита и спасување и актуелен градоначалник, откако претходно семејствата на настраданите повикуваа на одговорност и неселективна правда.
Под слоганот „Марш на ангелите“, семејствата на загинатите во текот на денот изразија протест пред институциите, барајќи правда за своите најблиски кои загинаа во пожарот. Маршот почна пред зградата на Јавното обвинителство, а претставници на семејствата на загинатите се сретнаа со републичкиот јавен обвинител Љупчо Коцевски и тимот обвинители кои постапуваат во предметот каде што беа информирани за текот на истрагата.
Од пред Обвинителството, маршот продолжи пред зградата на Собранието каде што имаа средба со пратеници од Левица и СДСМ. Најпрво излегоа пратениците Борис Крмов и Јована Мојсоска од Левица, а потоа и пратениците од СДСМ. Следуваше разговор на семејствата со лидерот на СДСМ, Венко Филипче. Тој им порача дека се на нивна страна и дека даваат сè од себе во борбата за правда.