Со изборот на владата заврши техничкиот мандат на владата на Дритан Абазовиќ, на која ѝ беше изгласана недоверба во август 2022 година
Парламентот на Црна Гора рано изутрина, по седницата која траеше цела ноќ, ја избра владата на премиерот Милојко Спајиќ, јавува Радио Слободна Европа.
Владата ја поддржаа 46 пратеници од Движењето Европа на Спајиќ, партијата на неодамна распуштениот проруски Демократски фронт (ДФ), Демократите, Социјалистичката народна партија и албанските национални партии.
Овие партии имаат министри во владата, освен партијата ДФ, која според договорот со премиерот Спајиќ, ќе влезе во владата за една година.
Против беа 19 пратеници од опозицијата. Пет пратеници беа отсутни, а еден воздржан.
Со изборот на владата заврши техничкиот мандат на владата на Дритан Абазовиќ, на која ѝ беше изгласана недоверба во август 2022 година.
Владата има пет потпретседатели и 17 министри
Министри од партијата на премиерот Спајиќ се Филип Ивановиќ за надворешни работи, Маида Горчевиќ за европски прашања, Анѓела Јакшиќ-Стојановиќ за образование, наука и иновации, Новица Вуковиќ за финансии, Филип Радуловиќ за транспорт, Андреј Миловиќ за просторно планирање, урбанизам и државна сопственост, Воислав Шимун за здравство, Наида Нишиќ за труд и социјална заштита и Саша Мујовиќ за енергетика и рударство.
Претседателот на Демократска Црна Гора, Алекса Бечиќ, е вицепремиер за безбедност, внатрешна политика, европски и надворешни работи, а Момо Копривица е вицепремиер за политички систем, правда и антикорупција. Драган Краповиќ е министер за одбрана, Владимир Мартиновиќ е министер за туризам, екологија и одржлив развој, а Тамара Вујовиќ е министер за култура и медиуми. Министер за внатрешни работи е Данило Шрарановиќ. Вицепремиер за труд, образование, здравство и социјала е Срѓан Павиќевиќ од ЦИВИС.
Што се однесува до албанските партии, Ника Ѓељошај е вицепремиер за економска политика и министер за економски развој, Фатмир Ѓека е министер за човекови и малцински права, а Мараш Дукај е министер за јавна администрација. Претседателот на Социјалистичката народна партија (СНП) Владимир Јоковиќ е министер за земјоделство, шумарство и водостопанство, а потпретседателот на СНП Драгослав Шќекиќ е вицепремиер за демографија и млади и министер за спорт и млади.
Една од причините за одржување на ноќната седница, што е невообичаена практика, беше до утрото да се гласа за владата, за во вторник на 31 октомври таа да ја одржи првата седница и да донесе одлука за одложување на пописот.
Пописот требаше да започне в среда, на 1 ноември. Опозицијата се закани со бојкот сомневајќи се во неговата регуларност и побара одложување за шест месеци.
Што пишува во програмата на Стајиќ
Првата цел на владата на Спајиќ е фискална консолидација поради, како што се наведува, рационализација на буџетските трошоци, а посебен фокус ќе биде ставен на реформите во пензискиот и здравствениот систем.
„Оваа Влада има конкретна цел поврзана со подобрување на стандардите на нашите граѓани преку имплементација на програмата Европа сега 2.0“,
се наведува во програмата на владата.
Главни надворешно-политички приоритети на владата се полноправното членство на Црна Гора во Европската Унија (ЕУ), активно и кредибилно членство во НАТО и подобрување на добрососедските односи.
Спајиќ најави и дека еден од приоритетите на Владата се реформите во судството и формирањето на Специјален суд за случаи на висока корупција и организиран криминал.