Од денеска во земјава за лекување на ковид-19 кај одредени пациенти ќе почне да се применува комбинацијата што ја содржат лековите хидроклор и азитромицин, која веќе се покажа како ефикасна во повеќе земји. Таа комбинација, како што информираше вчера министерот за здравство Венко Филипче, е одобрена на вчерашниот состанок на Комисијата за етички прашања во Агенцијата за лекови – МАЛМЕД, а ќе биде аплицирана и во болнички и во домашни услови по соодветна индикација од лекар.
„Станува збор за комбинацијата на антималарикот хлорохидроксикинин и азитромицин (сумамед), која се покажа ефективна во повеќе земји, на повеќе пациенти и согласно таа одлука веќе од утрешниот ден ќе биде аплицирана на пациентите кои се лекуваат кај нас во болнички или домашни услови, но по соодветна индикација од лекарот. Прво, потребна е проценка на клиничката состојба, поради тоа што се дава кај одредена група, а не кај сите пациенти“,
рече Филипче на вчерашната прес-конференција.
Во очекување на најновите податоци за состојбата со коронавирусот, вкупниот број на заболени од ковид-19 во земјава до вчера изнесува 148.
Вчера беа дијагностицирани 12 нови случаи, од кои седум се во Скопје, а пет во Куманово. Најмладиот пациент заболен од ковид-19 во земјава е двегодишно дете од Скопје, а позитивни на овој вирус се и неговите родители, но сите се со лесна клиничка слика и се на домашно лекување.
Според местото на живеење, досега заболени има во 6 градови: Скопје (88), Дебар (40) – од кои еден починат, Куманово (осум) – од кои еден починат, Штип (седум), Кавадарци (два), Охрид (два), Гостивар (еден).
На Инфективната клиника се хоспитализирани 29 пациенти кои се лекуваат стационарно, од кои во тешка општа состојба на респираторна машина е една пациентка, кај која во последните денови нема промена, шест се со потешка слика, но респираторно се самостојни. Амбулантски се прегледани седум пациенти и земен е еден брис. Тројца пациенти имаат хоспитален третман, а тројца се на домашно лекување.
Од вчера Институтот за јавно здравје спроведува тестирање на сите лица кои беа во врска со директорката на кожната клиника. Се работи за голема бројка, тие се се уште во изолација и за да нема оптоварување во лабораторијата ќе се тестираат во неколку циклуси.