Во Азија, за околу три отсто паднаа акциите на „Тојота“, „Хонда“ и „Хјундаи“
Откако американскиот претседател Доналд Трамп потпиша извршна наредба за воведување царини од 25 отсто за увоз на автомобили и лесни камиони произведени надвор од Соединетите Американски Држави (САД), акциите на повеќе светски автопроизводители почнаа да паѓаат. Така, акциите на „Џенерал моторс“ паднаа за осум отсто, а акциите на „Крајслер“ т.е. неговата матична „Стелантис“ и на „Форд“ паднаа за 4,5 отсто.
Како одговор на воведените тарифи, канадскиот премиер Марк Карни најави дека можат да воведат реципрочни мерки против САД.
„Ќе ги браниме нашите работници, ќе ги браниме нашите бизниси, ќе ја браниме нашата земја, а тоа ќе го правиме заедно“,
рече тој.
На прашањето кога може да се очекува одговор на мерките на САД, најави дека тоа ќе се случи наскоро, оти Канада може да воведе контратарифи.
Јапонскиот премиер Шигеру Ишиба, најави дека и Токио ќе го разгледа одлуката на САД, но и дека ќе ги стави сите опции на маса.
Ги посочи значајните инвестиции на Јапонија во САД, како и фактот дека и таму се отвораат работни места.
Во Азија, за околу три отсто паднаа акциите на „Тојота“, „Хонда“ и „Хјундаи“.
Воведувањето царини од 25 отсто за увоз на автомобили стапува во сила на 2 април, а наплатата ќе почне ден потоа.
Трамп смета дека мерката ќе доведе до огромен раст во автомобилската индустрија, ветувајќи дека ќе го поттикне создавањето нови работни места и инвестиции во САД.
Претседателката на Европската комисија, Урсула фон дер Лајен, со објава на Икс реагираше на наредбата на Трамп, посочувајќи дека жали за ваквата одлука, но најави и дека ќе бараат решенија по пат на преговори.