Во изолација е и претседателот на Европскиот совет Шарл Мишел, поради што е откажана средбата на лидерите на ЕУ
Германскиот министер за економија Питер Алтмајер е вториот член на владата во Берлин, кој од вчера е во карантин, пренесуваат британските медиуми.
Тој ќе биде во домашна изолација поради контакт со помошникот на еден од неговите колеги – министри во ЕУ, чиј тест за коронавирусот е позитивен.
Претходно, и министерот за надворешни работи Хајко Мас соопшти дека од вчера е во карантин, откако било утврдено дека еден од неговите телохранители има ковид-19.
Иако првиот тест на Мас покажа дека е негативен, тој ја откажа планираната посета на Јордан.
Веста за Мас доаѓа само еден ден откако беше одложена средбата на лидерите на ЕУ бидејќи претседателот на Европскиот совет Шарл Мишел е во изолација поради контакт со лице заразено со коронавирусот.
Во меѓувреме, Германија ја прошири листата со 11 ризични земји и региони во Европа поради ситуацијата со ковид. На неа се наоѓаат големи делови на Франција, вклучително и Париз, Чешка и Португалија, за кои се предупредуваат граѓаните да не патуваат.