Во меѓувреме, од ЕУ испратија и нова порака до компанијата. Претседателката на Европската комисија (ЕК) Урсула фон дер Лајен по состанокот на Европскиот совет вчера уште еднаш порача дека „Астра Зенека“ нема да извезува вакцини надвор од ЕУ додека не ги исполни договорите со Унијата
Професорот од Оксфорд, Џон Бел, кој беше еден од клучните научниците кои работеа на развојот на вакцината на Универзитетот и компанијата „Астра Зенека“, во интервју за британски „Телеграф“ најави дека би можело да има зголемување на целата на вакцината по критиките што изминатиот период ги упатија лидери од ЕУ кон компанијата.
На „Астра Зенека“, потенцира тој, не ѝ ни оддадоа признание за нејзината одлука да не профитира од вакцината и да ја продава по ниска цена, но критиките ја доведуваат во прашање таквата одлука.
„Има момент кога ’Астра Зенека‘ може да каже: ’сега ќе престанеме да наплаќаме ниска цена затоа што не ни оддавате признание за сè што направивме‘. Цената на акциите на ’Астра Зенека‘ падна, не се зголеми. Произведуваме повеќе вакцини од кој било друг. Се работи за сигурна и ефикасна вакцина, а никому не му е грижа‘,
вели Бел во интервјуто.
Изјавите на научникот од Оксфорд ги коментираше и компанијата, но го потенцираа даденото ветувањето за ниска цена на вакцината.
„Од почетокот, пристапот на ’Астра Зенека‘ е да се третира развојот на вакцините како одговор на вонредната глобална закана по здравјето и ќе продолжи да работи во истиот дух. Апсолутно сме посветени да обезбедиме вакцини во што е можно повеќе земји и при тоа да не заработиме ништо. Компанијата вети дека ќе ја продава вакцината по цена која е доволна само за покривање на трошоците за време на пандемијата“,
рече портпаролот на „Астра Зенека“.
Во меѓувреме, од ЕУ испратија и нова порака до компанијата. Претседателката на Европската комисија (ЕК) Урсула фон дер Лајен по состанокот на Европскиот совет вчера уште еднаш порача дека „Астра Зенека“ нема да извезува вакцини надвор од ЕУ додека не ги исполни договорите со Унијата.
„Мислам дека на ’Астра Зенека‘ ѝ е јасно дека мора да го испочитува договорот што го има со земјите членки на ЕУ пред да почне повторно да извезува вакцини“,
рече претседателката на ЕК.
Таа нагласи дека обврска на ЕУ е да им покаже на своите граѓани дека и тие ќе го добијат својот фер удел во дистрибуцијата на вакцините и оти затоа компаниите се должни да ги почитуваат нивните договори со Унијата пред да извезуваат во други региони.