Директорот на Центарот за управување со кризи (ЦУК), Стојанче Ангелов, најавува дека за неколку месеци ќе биде функционален единствениот телефонски број за помош – 112, откако нефункционалноста на системот се покажа и со кратовскиот случај, кога жител на планинското село Емирица не можеше да добие помош поради непристапноста на теренот, па пет часа екипа на Итната медицинска помош и роднини го носеа на раце.
Ангелов и денеска нагласи дека не бил известен за случајот, а доколку знаел ќе побарал хеликоптер. Тој вели дека системот мора да се реформира и затоа се нафатил на таа функција, па оставка во овој момент од него би била дезертирање.
„Јас сум овде директор само 4 месеци, средувањето на состојбата во ЦУК и целиот систем ќе биде долготраен сложен процес за кој треба уште време, јас не сум дезертер и не се повлекувам од борба, останувам посветено да го завршам тоа што дојдов овде, а тоа е целосна реформа на системот за управување со кризи. За такво нешто имам мандат и од премиерот и од министрите, а со моето именување за в.д. директор и од страна на целата влада“,
рече Ангелов.
Сепак, вели тој, ако Владата побара одговорност од него, тој ќе ја прифати.
За реформа на системот за управување со кризи, вели тој, пред две години е формирана група што треба да ги утврди слабостите. Утре групата ќе го има завршниот состанок.
„За да не ни се случуваат вакви несакани настани, ние како ЦУК неколку месеци работиме на воспоставување и имплементација на повикувачкиот европски број 112. Се работи за број на којшто било кој граѓанин ќе добие каква било помош. На овој број ќе може да се пријавуваат физички напади, сообраќајни несреќи, пожари, потребна медицинска помош. Сето она што денес го бараат на броевите 192, 193, 194 ќе биде концентрирано на само еден повикувачки број, а тоа е бројот 112, како што е насекаде во целата ЕУ“,
вели Ангелов.
За оваа цел од ЕУ се донирани 1,5 милион евра за набавка на опрема и средства, како и за обука на лицата што ќе работат на овој повикувачки број. Државата обезбедила просторни услови и се работи на селекција на луѓето што ќе ги примаат повиците на оваа линија.
Ангелов е оптимист дека во јули бројот 112 ќе биде функционален.
„Тоа не значи дека останатите броеви веднаш ќе бидат укинати, туку во прва фаза, по наша процена, можеби година или две ќе бидат функционални и останатите броеви, но кога во иднина кој било наш граѓанин ќе има каква било мака, проблем здравствен, безбедносен, ќе може да се јави на 112, а дежурниот оператор на овој број веднаш ќе го препрати повикот онаму каде треба. Нема да се работи за механичко препраќање, туку тој едноставно ќе се погрижи ако имаме сообраќајна несреќа, имателот на повик истовремено ќе повика и полиција, и брза помош и противпожарна. Се работи за комплексен сектор кој во рамките на ЦУК ќе работи за неколку месеци“,
рече директорот на ЦУК.
Што се однесува до кратовскиот случај, каде што човекот за кого се бараше помош почина, Ангелов најавува целосно расчистување.
Од ЦУК, вели тој, се обратиле до три министерства. Од Министерството за здравство очекуваат одговори на прашањата што предвидуваат нивните протоколи во вакви ситуации како што беше случајот со Кратово и дали членовите на лекарската екипа имале комуникација со ЦУК, како и која е нивната страна на приказната за тоа што им е одговорено од оперативецот на ЦУК. Од Министерството за локална самоуправа, пак, Ангелов ги очекува одговорите зошто од институциите на локалната самоуправа не било испратено теренско возило и дополнителни сили за помош, зошто не е ангажирана екипа на противпожарната бригада, како и зошто градоначалникот на Кратово не побарал помош од републичките сили, како што предвидува членот 35 од Законот за заштита и спасување.
Она што го очекуваат како појаснување од МВР е зошто од страна на полицијата не било обезбедено теренско возило и не биле испратени припадници на полицијата да помогнат. Она што го знаат во ЦУК засега, вели Ангелов, е дека од кратовската полиција било понудено неколку млади полицајци да отидат да помогнат, но од Брзата помош тоа било одбиено.
„Нѐ интересира и детален извештај од комуникацијата на лекарите и полициските службеници. Што било побарано и што било одговорено?“,
рече Ангелов.
Овој случај, кој предизвика огромно внимание во јавноста го објави лекарот Павле Зафиров од Кратово, раскажувајќи ја голготата низ која поминале. Според она што го раскажа на социјалните мрежи, по повикот заедно со медицински техничар, шофер и сестра, како и двајца роднини на повредениот се упатиле кон планинското место каде што живеел повредениот. Не можеле да стигнат до местото, па по 30-40 километри возење продолжиле пеш.
„Затекнавме трогателна ситуација. Лицето беше паднато на патеката која од неговата куќа води до трлото во кое одгледува значителен број овци кои во овој период од годината се јагнат и мораат да бидат проверувани секоја вечер. За некое чудо, лицето после поминати повеќе од 12 часа на поларна температура во снегот беше сè уште живо, за разлика од овцата која најверојатно имаше излезено да ја врати во трлото по јагнењето. Го имаше најдено неговата 90-годишна мајка која немајќи сила да го крене поминала цела ноќ покрај него обидувајќи се да го загрее“,
раскажа докторот.
Откако го внеле во куќата, му пружиле помош, поради сериозноста на ситуацијата, побарале помош, но не добиле.
„Оставени сами на себе и без никаква помош, ги прашав неговите роднини и медицинскиот техничар дали се спремни на раце да го изнесеме човекот до возилото, целосно свесен за ризикот во кој ги ставам нив и самиот себе и за одговорноста која ја преземам. Сепак, професијата не ми дозволува ни да помислам да не го транспортирам пациентот кој имал среќа да преживее на тој студ и снег. Роднините најдоа колци и ќебиња од кои со свои раце зашивме носила, го замотавме во јамболии човекот и го поставивме на носилката и додатно го обезбедивме шиејќи ги однадвор ќебињата. Ние четворицата околу 5 часа на раце го носевме пациентот по козји патеки низ екстремно стрмен предел и шума наместа затрупани со снег, преку река и низ нагорнина која ретко кој би се осмелил да ја помине и пеш“,
рече лекарот, кој наведува дека се решил настанот да го раскаже јавно за да алармира колку е нефункционален системот.