Во студијата во која учествувале 3 700 млади луѓе на возраст од 12 до 18 години, немало симптоматски случаи на ковид-19 меѓу оние што примиле две дози на вакцината
„Модерна“ стана вториот производител што објави дека испитувањата на нивните вакцини кај помлади луѓе биле успешни. Потврдено е дека нивната вакцина може да го запре пренесувањето на инфекција кај лица на возраст од 12 до 18 години.
Како и „Фајзер“, чија вакцина беше одобрена од Американската агенција за храна и лекови (ФДА) за адолесценти на возраст од 12 до 15 години, така „Модерна“ вели дека нејзината вакцина е 100-процентно ефикасна кај младите.
Во студијата во која учествувале 3 700 млади луѓе на возраст од 12 до 18 години, немало симптоматски случаи на ковид-19 меѓу оние што примиле две дози на вакцината. Бидејќи има помалку случаи на заразени кај деца и адолесценти, истражувачите биле водени од дефиницијата на Американскиот центар за контрола на болести (ЦДЦ), која вклучува поблаги симптоми. Применувајќи ја оваа дефиниција за само еден симптом плус позитивен тест за размаска, истражувачите од „Модерна“ забележале 93% ефикасност по единечна доза.
Компанијата вели дека немало сериозни несакани ефекти. Болка во раката, главоболка, замор и треска се пријавени по втората доза. Сите оние што учествуваа ќе бидат следени во текот на следните 12 месеци за да се осигури дека нема долгорочни ефекти.
„Охрабрени сме од фактот дека mRNA-1273 беше многу ефикасна во спречувањето на ковид-19 кај адолесцентите. Особено возбудливо е да се види дека вакцината може да спречи инфекција со Sars-CoV-2 “,
вели Стефан Бансел, извршен директор на „Модерна“.
„Овие резултати ги доставивме до американската ФДА и регулаторите ширум светот на почетокот на јуни и ќе побараме одобрување“,
најави тој.