Aко компаниите продолжат да инвестираат во човечки ресурси, поддршката што сега ја добиваат може да стане бесповратна, вели советник на премиерот
Со одредбата, која дозволува отпуштање одреден процент на вработените во фирмите, всушност, се подобрува Уредбата за исплата на плати за вработените во приватни фирми кои имаат загуба поради корона-кризата. Ова е оценката на Фатмир Битиќи, советник на техничкиот премиер и претседател на Комисијата за финансии на СДСМ, по реакциите на синдикатите и повеќе здруженија на граѓани на најновите промени на владината уредба со која се овозможува исплата на плата до 14 500 за вработени во приватниот сектор.
Според Битиќи, на ваков начин, се пополнува празнината што беше оставена во однос на можноста дел од вработените сами да си дадат отказ или да им истечат договорите за работа на определено време.
„Мислам дека првичната реакција на сите беше избрзана затоа што треба да се прочита целата Уредбата беше донесена вчера. Различните критериуми дадени во неа укажуваат на неколку моменти. Да, вистина е дека и компаниите кои имаат пад на вработени од 5, 10 или 15 отсто, во зависност од големината, можат да добијат поддршка од страна на државата. Но притоа треба да се види и другиот критериум – дека ова се однесува на сите начини на вработување во една компанија. Тоа можат да бидат вработени на неопределено, на определено, на полно или пола работно време. Ова во суштина е само подобрување на претходната Уредба, во која имаше вакуум што ќе се случи ако работниците сами си отидат од компанијата или ако на работници кои се на определено време им истекол договорот. Во таков случај ние би требало да не ја поддржиме целата компанија, односно да не поддржиме стотина други вработени, само затоа што некој си отишол“,
објаснува Битиќи.
Според него, оваа нема да претставува директен удар и нема да ги поттикне компаниите во намалување на бројот на вработени.
„Напротив, во мерката имаме дадено и други критериуми, а тоа е значи ако компаниите продолжат да инвестираат во човечки ресурси поддршката што сега ја добиваат, наспроти претходната Уредба, може да стане грант, како бесповратна помош. Ова е друг поттик кој, во суштина, треба да ги мотивира компаниите не само да ги задржат вработените, туку и да продолжат да инвестираат во човечки капитал“,
вели Битиќи.
На промените на условите во Уредбата за минималецот за приватниот сектор вчера реагираше и опозицијата. Првично, Владата предвиде критериум според кој фирмите кои бележат загуби поради корона-кризата може да аплицираат за помош од државата, ама под услов до септември да ги задржат сите вработени. Потоа следуваше промена на овој рок до јули, за вчера да биде соопштено дека и фирмите каде што ќе има заминување на работници, соодветно на вкупниот број на вработени, ќе може да побараат субвенционирање на платите или придонесите.