За време на средбата, Ковачевски ја запознал својата естонска колешка со претстојните чекори кои земјава треба да ги направи во својот евроинтегративен пат, а воедно се заблагодарил за поддршката што С Македонија ја добива од Естонија во процесот на евроинтеграции, како и за поддршката во полето на кибербезбедоста и дигитализацијата
По членството во НАТО, сакаме да ѝ посакаме добредојде на Северна Македонија и во Европската Унија, порача премиерката на Естонија, Каја Калас, во видеопорака по денешната билатерална средба со премиерот Димитар Ковачевски кој е во посета на Талин и учествува на Талинскиот дигитален самит 2023.
Калас изрази цврста поддршка за македонскиот евроинтеграциски пат, велејќи дека Естонија се надева оти земјава ќе го направи последниот чекор за да го почне процесот на зачленување во Унијата.
„С Македонија и Естонија се добри пријатели и партнери во НАТО и би сакале да ѝ посакаме добредојде и во Европската Унија. Ние сме силни поддржувачи на С Македонија и се надеваме дека ќе го направите последниот чекор кој е потребен за да го почнете процесот на зачленувањето во ЕУ. Би сакале да се заблагодариме и за големата поддршка која ѝ ја давате на Украина, за да можат да ја победат оваа војна“,
вели естонската премиерка Калас во видеоизјавата по средбата со премиерот Ковачевски.
За време на средбата, Ковачевски ја запознал својата колешка со претстојните чекори кои земјава треба да ги направи во својот евроинтегративен пат, а воедно се заблагодарил за поддршката што С Македонија ја добива од Естонија во процесот на евроинтеграции, како и за поддршката во полето на кибербезбедоста и дигитализацијата.
„Заемно беше констатирана важноста од забрзување на процесот на приближување како на С Македонија, така и на другите земји од регионот кон ЕУ, во светло на новата геополитичка реалност предизвикана од воената агресија на Руската Федерација врз Украина. Како непосреден сосед на Русија, денес повеќе од било кога, Естонија ја истакнува и разбира важноста и силата на трансатлантската врска и европската солидарност, и посакува Северна Македонија што побрзо се најде на истата европска маса заедно со Естонија и другите земји членки на ЕУ“,
информираат од Владата во врска со денешната средба меѓу Ковачевски и Калас.