Велика Британија од денеска почна да ја користи вакцината на „Модерна“, која станува трета вакцина што ја користат британските здравствени власти за имунизација на населението, по оние на „Фајзер“ и „Астра Зенека“.
Употребата на „Модерна“ започна во Велс и властите очекуваат да почне да се користи и во останатиот дел од Обединетото Кралство. Ова, како што пренесуваат медиумите, доаѓа во период кога е забавена набавката со „Астра Зенека“ поради проблеми во производството.
Велика Британија досега вакцинира 31,6 милиони луѓе со прва доза од вакцина против ковид-19, а од нив ревакцинирани се 5,5 милиони. Наскоро се очекува да биде имунизирано половина од населението.
Според податоците „Our World in Data“, светски лидер во вакцинирањето е Израел, а следни се Обединетите Арапски Емирати (ОАЕ), Чиле, Велика Британија, Бахреин, Србија и Унгарија.