Министерката за одбрана Славјанка Петровска денеска во Пентагон имаше средба со Мара Карлин, вршител на должноста заменик-потсекретар за одбрана на САД за одбранбена политика.
На средбата со Карлин, министерката посочи дека силната македонско-американска соработка ја зголемува безбедноста и ја зацврстува колективната одбрана во Алијансата.
„Сојузништвото во НАТО не е само збор – тоа е наша најголема вредност. Заедно сме посилни и само заедно можеме да ги одбраниме вредностите и принципите во кои веруваме како држави и како општества. Драго ми е што сме целосно посветени на соработката во одбраната. Со американската поддршка за Армијата и македонските капацитети за извежбување ја развиваме интероперабилноста и вештините на секој наш припадник“,
порача министерката.
Како што соопшти Министерството за одбрана, Петровска се заблагодари за поддршката од САД во процесот на модернизација и опремување и порача дека интензивните инвестиции во Армијата, кои се инвестиции и во безбедноста на земјата и на граѓаните, ќе продолжат и во иднина.
„САД досега ја поддржаа македонската одбрана со 330 милиони долари од кои над 135 милиони се вложени само во последната година, а домашниот буџет за одбраната следната година ќе достигне два проценти од бруто-домашниот производ, од кои повторно како и годинава, голем процент ќе бидат наменети за модернизација и опремување“,
рече Петровска.