„Времето на партиски штабови во МВР е поминато, како што е минато и времето кога полицијата тепаше студенти, правеше упад во невладини организации и апсеше новинари. Секој што ќе се обиде да ги повтори старите методи со ‘едно ливче нека снема’ или добро познатото ‘фаќање за уши’ ќе се соочи со законот“, рече денеска дополнителната заменик-министерка во МВР, Славјанка Петровска, на прес-конференцијата на која говореше за приоритетите во работењето на Министерството во пресрет и за време на изборите.
„Претстојните избори се од исклучително значење за сите граѓани во државата, без разлика на нивната партиска или етничка припадност, период кој носи дополнителна одговорност врз сите членови на извршната власт да ги извршуваат своите функции во интерес на јавноста. МВР ќе продолжи да ја гарантира безбедноста на граѓаните. Изминатите две години поставивме стандарди во работата на полицијата, според кои таа не може и не смее да биде злоупотребувана од ниту една политичка партија“,
рече Петровска.
Од ВМРО-ДПМНЕ, пак, како одговор на прес-конференцијата на Петровска преку соопштение порачаа дека заврши времето кога Оливер Спасовски наместо да ги гони криминалците го користеше МВР за заштита на криминалот.
„Кога Славјанка Петровска говори за реформи и безбедност, лаже и манипулира исто како и нејзиниот шеф, најнеуспешниот министер за внатрешни работи Оливер Спасовски во чие време имавме десетици нерасчистени престрелки и убиства. Кога Петровска говори за професионалност во МВР, таа мисли на ангажирањето на поранешниот началник на СВР Штип, сега обвинет за тежок криминал, како советник на Директорот на БЈБ. Кога Петровска зборува за професионалност во МВР, мисли на Драган Симоновски, советникот на Спасовски кој заврши во притвор поради злоупотреба на ПИ-мерки за уцена и Лазе Велковски, чија ќерка замина на одмор во Грција со службено возило“,
се вели во реакцијата од опозициската партија.