Министерката за одбрана Славјанка Петровска најави набавка на хеликоптери за македонската армија. Во интервју за ТВ Сител таа информира дека се работи за мултифункционални летала со западна платформа. Во таа насока, рече, се и плановите за модернизација на Армијата, но и долгорочниот план за развој на одбранбените способности.
„Во поглед на набавката на системот за противвоздушна одбрана, договорот е веќе финализиран, јас на почетокот на септември ќе одам во Париз на еднодневна посета и каде заедно со министерот за одбрана на Франција ќе го потпишеме овој договор. Останатите договори се во понапредна фаза“,
истакна Петровска.
Таа нагласи дека со донацијата на тенковите на Украина воопшто не се влијаело врз борбената готовност на армијата, бидејќи на нив веќе не се ни сметало.
„Се работи за трета генерација неперспективна опрема, која за кусо време ќе требаше да биде предмет на уништување. Донацијата не влијае на нашата Армија, а во процесот на пристапување кон НАТО правени се многубројни планови во однос на тоа каква треба да е структурата на нашата Армија, но и за тоа што значи борбена готовност на нашата Армија и каков вид на вооружување ние треба да поседуваме. На македонската армија ќе и ставиме на располагање 33 нови оклопни возила. Шест од нив се веќе стасана, а ја очекуваме испораката и на останатите 27 такви возила“,
рече министерката за одбрана.
–