Дополнителната заменик-министерка во МВР, Славјанка Петровска, вели дека е лажна вест оти е во самоизолација. Како што објави таа, по спроведената епидемиолошка анкета било заклучено дека нема потреба да биде во самоизолација.
„Најостро ги демантирам пишувањата во некои медиуми дека се наоѓам во самоизолација и дека со денешната прес-конференција сум ја прекршила мерката. Повторно информирам дека согласно направената епидемиолошка анкета оценето е дека нема потреба да одам во самоизолација, со препорака и понатаму да носам лична заштитна опрема и да ги почитувам мерките за заштита. Со ширењето лажни вести нема да ја скриете вистината за оние кои ги прекршуваат мерките“,
вели Петровска.
Таа денеска одржа прес-конференција во Владата за случувањата на „Боемска“ поврзани со лидерот на ВМРО-ДПМНЕ, Христијан Мицкоски.
На нејзиниот настап реагираше и опозициската партија велејќи дека ако е точно дека има решение за самоизолација, тогаш го прекршила и со тоа направила кривично дело.
*Поврзани вести:
ВМРО-ДПМНЕ: Дали Петровска ја прекрши изолацијата и направи кривично дело?