Дополнително 30 армиски припадници се подготвени да помогнат доколку се јави потреба
Министерката за одбрана, Славјанка Петровска, објави дека земјава ќе испрати еден хеликоптер на Армијата да помогне во справувањето со пожарите во Грција. На готовс ќе бидат и 30 војници ако има потреба да заминат и да им помогнат на грчките служби.
„Солидарни сме со нашиот сосед и сојузник, Грција во борбата со огнените стихии. Еден хеликоптер на Армијата на Република Северна Македонија ќе биде испратен да помогне во борбата со пожарите, додека 30 армиски припадници се подготвени да помогнат доколку се јави потреба. Заедно сме посилни, заедно можеме да бидеме победници во борбата со овие природни катастрофи!“,
вели Петровска.
Поради пожарите кои беснеат во Грција, вчера во областа Атика, поширокиот регион на Атина, превентивно беа евакуирани четири населби, националната опсерваторија, како и една детска болница на североистокот на оваа област.
Денеска околу 14 часот по локално време, пак, во западниот дел на Атика избувна нов шумски пожар, а превентивно се евакуирани жители од мала населба од предградието Мегара.
Пожарот, како јави дописничката на МИА, брзо се прошири поради боровата шума, но засега е далеку од домовите, иако конкретната област не е густо населена.
Интервенираат 45 пожарникари со два пешадиски тима, 12 возила, пожарникари волонтери, како и седум авиони и четири хеликоптери, од кои еден е за координација.