Во овој момент, сме во една таква фаза на разговори за тоа што дополнително можеме да помогнеме. И се разбира како и претходно, доколку донесеме таква одлука соодветно ќе соопштиме, рече министерката за одбрана
Македонија ќе продолжи со поддршка на Украина во борбата за нејзиниот територијален суверенитет и интегритет, порача денеска министерката за одбрана, Славјанка Петровска во интервју за телевизија Канал 5.
„Секогаш кога имаат потреба од каква било поддршка и помош се обраќаат до нас. И се разбира, како и во претходните три случаи кога ги донесовме одлуките, доколку тие капацитети се на наше располагање, и не се потребни на нашата Армија, ќе ги отстапиме. Во овој момент, сме во една таква фаза на разговори за тоа што дополнително можеме да помогнеме. И се разбира како и претходно, доколку донесеме таква одлука соодветно ќе соопштиме. Се разбира дека и остануваме на она ветување, штом безбедносните ризици се намалат или се отстранат, ќе соопштиме во детали колкав и каков вид на воена опрема сме донирале“,
рече Петровска.
Во однос на тоа дали ќе добиеме некаква надокнада за тоа што како помош го испраќаме во Украина, министерката Петровска одговори дека неодамна е објавена финансиската помош од САД, што, подвлече, можеби не е директен договор помеѓу нас и Владата на САД, но јас би го нарекла тоа начин на кој тие ја ценат нашата ангажираност во поддршката на Укрина.
„Она партнерство што го имаме и со САД и со неколку други партнери, кои се и воедно членки на Алијансата, само покажува уште еднаш и е доказ дека и покрај сите скептици и дезинформации, дека сојузниците се грижат едни за дури и се помагаат“,
истакна министерката.
Петровска информира дека е потпишан договорот за набавка на системот за противвоздушна одбрана од Франција и објасни дека стратешките документи за развој предвидуваат неопходност од ваков систем за Армијата. Инвестирањето во одбраната, нагласи таа, е дологорчен процес на планирање.
Во јули годинава од македонското Министерството за одбрана соопштија дека Македонија ѝ донирала тенкови на Украина.
Кога на социјалните мрежи беа објавени снимки од транспортот на тенковите, од Министерството за одбрана на РСМ на прашањата на „360 степени“ одговорија дека станува збор за трета генерација тенкови кои со развојот на технологијата за неколку години би биле неконкурентни и некомпатибилни со нашите побарувања за снабдување со западна платформа, а дополнително за нивно уништување во земјава ќе се потрошат пари што, како што рекоа, е нецелисходна активност за нашата Армија.
Станува збор за тенкови Т-72 од советско производство кои земјава ги купи од Украина во 2001 година.
Руската државна агенција РИА новости, пак, денеска информира дека руските падобранци уништиле баталјон од украински вооружени формации, кој бил опремен со македонски и словенечки тенкови. Агенцијата објави и видео за кое тврди дека е снимено веднаш по битката додека се проверувала изгорената опрема. Нема начин за независно да се потврди објавата на РИА.