Руската државна агенција РИА новости објави видео на кое тврди дека се гледаат уништени тенкови од советско производство што земјава ѝ ги донираше на Украина во јули годинава
Тогаш од Министерството за одбрана рекоа дека станува збор за трета генерација тенкови кои со развојот на технологијата за неколку години би биле неконкурентни и некомпатибилни со нашите побарувања за снабдување со западна платформа
Руските падобранци уништија баталјон од украински вооружени формации, кој беше опремен со македонски и словенечки тенкови, објави руската државна агенција РИА новости. Агенцијата објави и видео за кое тврди дека е снимено веднаш по битката додека се проверувала изгорената опрема. Нема начин за независно да се потврди објавата на РИА.
„Како резултат на успешна одбрана во насока Кривој Рог, една од десантните единици на руската армија целосно го уништи првиот механизиран баталјон на 28. посебна механизирана бригада на украинската војска, заедно со тенковите Т-72 доставени до Украина под програма за помош од земјите на НАТО. Исто така, на снимката може да се видат уништените MTLB и BRDM на непријателот“,
пишува РИА новости.
Откако во јули годинава од македонското Министерството за одбрана потврдија дека земјава ѝ донирала тенкови на Украина, портпаролката на руското Министерство за одбрана, Марија Захарова изјави дека тоа е голема грешка и дека е придонес „за криминалната активност на режимот во Киев против цивилното население во Донбас“.
Кога на социјалните мрежи беа објавени снимки од транспортот на тенковите, од Министерството за одбрана на РСМ на прашањата на „360 степени“ одговорија дека станува збор за трета генерација тенкови кои со развојот на технологијата за неколку години би биле неконкурентни и некомпатибилни со нашите побарувања за снабдување со западна платформа, а дополнително за нивно уништување во земјава ќе се потрошат пари што, како што рекоа, е нецелисходна активност за нашата Армија.
Станува збор за тенкови Т-72 од советско производство кои земјава ги купи од Украина во 2001 година.