Според официјални лица од Пентагон, во западните делови на Русија и околу границата со Украина моментално се наоѓаат 62 баталјонски тактички групи, што е за три повеќе од минатата недела. Бројката не ја вклучува војската во Белорусија
Пентагон соопшти дека Русија и натаму трупа војска на границата со Украина откако неделава таму се насобраа 62 баталјони, а во меѓувреме американскиот претседател Џо Бајден синоќа го предупреди својот украински колега Владимир Зеленски дека има „реална можност“ од инвазија идниот месец.
„Гледаме постојана акумулација на руски трупи околу границата со Украина, во Белорусија, како и раздвижување на руската морнарица во Средоземното и Црното Море, но и во Атлантикот. Сите овие активности не загрижуваат за руските намери за напад“,
изјави синоќа на брифинг за новинарите Џон Кирби, портпарол на Пентагон.
Тој изјави дека САД сè уште очекуваат руски одговор на американските документи испратени до Кремљ, а во врска со безбедносните гаранции до Москва во Европа, и дека сите се надеваат кризата да се разреши по дипломатски пат.
Според официјални лица од Пентагон, во западните делови на Русија и околу границата со Украина моментално се наоѓаат 62 баталјонски тактички групи, што е за три повеќе од минатата недела. Бројката не ја вклучува војската во Белорусија.
На брифингот Кирби ги откри американските бази каде што се стационирани 8 500-те војници кои се во состојба на зголемена готовност да заминат за Источна Европа, како дел од силите на НАТО за одговор.
Тој исто така укажа дека САД подготвуваат зголемена „деструкатвна и недеструктивна“ воена помош за Украина, но не даде точен опис на таа помош.
Во телефонскиот разговор синоќа Бајден го предупредил Зеленски за „реалната можност“ од инвазија на Русија врз Украина идниот месец, соопштија од Белата куќа.
„Претседателот Бајден изјави дека постои реална можност за напад на руските сили во Украина во февруари“,
изјави Емили Хорн, членка на Советот за национална безбедност во Белата куќа.
Тој додаде дека Бајден го зборувал тоа јавно и е нешто за што тие „предупредуваат веќе неколку месеци“.
Разузнавачите на САД постојано утврдуваат дека не знаат дали рускиот претседател Владимир Путин се откажал од идејата за окупација на Украина, но оценуваат за зголемена веројатност од тоа ако кризата не се разреши дипломатски.