Тука сакам да напоменам, бидејќи имаше и такви шпекулации, траењето на вонредна состојба од 14 дена нема никаква корелација со датумот за избори. Тоа е посебна тема која ќе ја дискутираме на лидерската идната недела.
Ова го порача претседателот Стево Пендаровски, откако објави дека ќе прогласи нова вонредна состојба, но од 14 дена, а не од 30 како што бараше Владата.
Лидерската, рече тој, планирал да ја свика во понеделник, но некои од лидерите рекле дека имаат некои обврски, па сè уште не е утврдено кога ќе се случи таа во текот на наредната недела.
Пендаровски денеска го доби и мислењето од ДИК во врска со изборниот процес, кое беше побарано по минатата лидерска средба.
„Во однос на тоа што ДИК го достави, таму се цитираат законските рокови кои се неопходни за да извлечеме еден транспарентен кредибилен процес. Тоа што ДИК не го кажува и не може да го каже бидејќи не е нејзина надлежност, е датумот на избори. Кога политичките лидери ќе решат да има избори, ќе ѝ се кажат тие работи на ДИК, тие ќе се приспособат, тие одат според законите. Членовите на ДИК се врвни професионалци сосема независно по кој пат се дојдени таму, јас имав посебна средба со нив. Она што го знам е дека за материјалот кој го доставија до мене, сите биле ’за‘. И да повторам, ДИК не е надлежна да кажува кога може да има избори. Ако политичарите кажат да има утре, задутре, тие велат тоа ќе го испратат во рамки на законската рамка“,
рече Пендаровски.
Покрај мислењето од ДИК, на лидерската се бараше да се обезбеди и мислење и протокол од Комисијата за заразни болести, како и од ОБСЕ/ОДИХР во однос на тоа дали ќе може да обезбедат набљудувачи.
Комисијата за заразни болести, рече Пендаровски, го изготвила документот и протоколот и тој е испратен до лидерите на партиите, а во него стои процена дека додека не се најде вакцина, изборите каде било во светот ќе мора да се изведуваат под посебен режим.
За одговорот од ОБСЕ/ОДИХРИ, претседателот изрази уверување дека многу скоро ќе го добијат.
Личниот став на Пендаровски, пак, е дека мора да има меѓународен мониторинг на изборите и оти без него, не би требало да се организираат избори.