Во однос на процедурата мислам дека, иако одат по скратена постапка, не се со европско знаменце и ќе има доволно време и за опозицијата да поднесе амандмани, да се вклучи во дебатата и да имаме аргументирана расправа како што доликува за овој важен сет закони, вели претседателот
Кога ќе ја видиме конечната верзија на сетот закони за автопатските делници, ќе можеме да знаеме за секој од нив каков ќе биде ставот во однос на потпишување на указот, изјави денеска претседателот на државата Стево Пендаровски одговарајќи на прашање дали ќе го потпише указот доколку помине законот за изградба на инфраструктурниот Коридор 8 и Коридор 10-д.
Пендаровски истакна дека не може отсега да се знае во каква конечна верзија ќе бидат тие законски решенија, затоа што, како што посочи, можат да бидат изменети со амандмани.
„Да ја почекаме дебатата, да ја видиме конечната содржина на тие закони, мојот тим на правници и во кабинетот и надвор од него се веќе ангажирани во следење на дебатата и на тоа што ќе излезе како конечен продукт. Во однос на процедурата мислам дека, иако одат по скратена постапка, не се со европско знаменце и ќе има доволно време и за опозицијата да поднесе амандмани, да се вклучи во дебатата и да имаме аргументирана расправа како што доликува за овој важен сет закони“,
рече Пендаровски.
Во однос на реакциите на експертите и граѓанските организации, Пендаровски посочи дека тие реагираат во оваа фаза, а станува збор за предлози на закони.
„Реагираат во оваа фаза, но станува збор за предлози на закони, влегуваат во Собранието и опозицијата и власта може да предложат амандмани. Важно е дека претседателот ја гледа конечната верзија на законот и само од тоа зависи. Ако ги повредуваат правата на граѓаните, ако завлегуваат во правата на трети лица итн., се разбира дека дел од тие закони нема да поминат, но да ги видиме во конечна верзија“,
нагласи Пендаровски.
Пратениците од власта, по многубројните реакции во јавноста, на денешната собраниска седница го повлекоа Предлог-законот за дополнување на Законот за заштита на културното наследство, по скратена постапка. Другите предлог закони ќе се носат по скратена постапка. Станува збор за законите за земјоделско земјиште; за експропријација; за урбанистичко планирање; за минерални суровини; за работни односи; за шумите; за градење како и на законот за утврдување јавен интерес и номинирање на стратешки партнер за имплементација на проектот за изградба на инфраструктурниот Коридор 8 и Коридор 10-д.