Согласно законските права, тој ќе користи канцеларија со тројца вработени од неговиот поранешен кабинет, а претставници на Министерството за внатрешни работи ќе продолжат да го обезбедуваат во согласност со безбедносните проценки што ги прават
Поранешниот претседател Стево Пендаровски нема да користи државна пензија која му следува по закон и ќе се врати на својата академска кариера како професор на Универзитетот „Американ колеџ“ во Скопје, информираат од неговиот тим.
Согласно законските права, тој ќе користи канцеларија со тројца вработени од неговиот поранешен кабинет, а претставници на Министерството за внатрешни работи ќе продолжат да го обезбедуваат во согласност со безбедносните проценки што ги прават.
„Во однос на административната и логистичка поддршка која му е потребна за средбите со поранешни и актуелни државници и за учество на меѓународни конференции, претседателот Пендаровски побара од државните институции повремено да користи канцеларија, но, бидејќи таква пракса и законски основа не постојат, Пендаровски во иднина ќе го искористи правото да отвори канцеларија каде што тројца од сегашните вработени во кабинетот ќе бидат ангажирани во поддршка на тие активности на поранешниот претседател“,
велат од тимот на Пендаровски во изјава за МИА.
Според Законот за правата на претседателот и неговото семејство, Пендаровски има право на пензија чиј износ е еднаков со износот на платата што ја прима шефот на државата, на канцелариски простор со најмногу тројца стручни соработници, лично обезбедување, како и право на користење на службено возило и возач согласно прописите што ги донесува министерот за внатрешни работи.
Правата што произлегуваат од највисоката државна функција ги користат поранешните претседатели Бранко Црвенковски и Ѓорге Иванов.