Претседателот на државата, Стево Пендаровски и министерот за економија, Крешник Бектеши денеска им оддадоа почит на 45-те македонски граѓани кои трагично ги загубија животите во автобуската несреќа на автопатот „Струма“ во Бугарија што се случи на 23 ноември, минатата година.
Пендаровски положи венец цвеќе на местото на трагедијата.
„Почит за 45 македонски граѓани, кои трагично ги загубија животите во страшната автобуска несреќа на 23 ноември 2021 година. На автопатот „Струма“ во соседна Бугарија положив цвеќе на местото на автобуската несреќа“,
напиша претседателот Пендаровски на својот фејсбук-профил.
Претседателот на државата е во посета на источниот сосед каде денеска во употреба беше пуштен гасниот интерконектор меѓу Грција и Бугарија.
Како што соопштија бугарските истражни органи на почетокот на февруари, оваа година најмалку две грешки на возачот – брзината и контролата врз возилото биле причина за трагедијата.
Сепак, страшната несреќа во земјава го отвори прашањето околу издавањето на лиценци за меѓународен превоз на патници.
На почетокот на минатиот месец скопското јавно обвинителство поднесе обвинителен предлог против сопственикот на гостиварската фирма „Беса транс“, во чиј автобус загинаа 45-те патници. Четириесет и едногодишниот управител на фирмата се товари дека со фалсификувана лиценца вршел меѓународен превоз на патници
„Ваквата лиценца за наведениот автобус воопшто не била издадена од Министерството за транспорт и врски, а управителот изготвената лажна јавна исправа им ја давал на возачите кои го управувале автобусот и со неа тие ја преминувале државната граница. Во текот на постапката, надлежниот јавен обвинител обезбеди докази дека во периодот од 10.01.2021 до 21.11.2021 година автобусот на тој начин 20 пати ја преминал државната граница на различни гранични премини“,
беше наведено во соопштението на Јавното обвинителство.