Алими беше осуден на шест години затвор за настаните од 27 април затоа што клучот од собраниските врати му го дал на началникот на обезбедувањето на Трајко Вељаноски, Дејан Ѓошевски. Зијадин Села го бранеше дека тој му го спасил животот
Ова е прво помилување од страна на претседателот по реакции за новогодишниот предлог за помилување на лица од Министерството за правда, кое на крај беше повлечено
Претседателот Стево Пендаровски донесе одлука за помилување на осудени лица, а на листата се наоѓа и името на Абдуљфета Алими, членот на собраниското обезбедување кој беше осуден за настаните од 27 април, за кого, пак, лидерот на Алијанса за Албанците тврдеше дека му го спасил животот. На листата која Пендаровски ја потпишал вчера, а денеска е објавена во Службен весник, има уште четири други лица.
Потполно се ослободува од понатамошно извршување на казната затвор лицето Александар Петровски. Делумно се ослободуваат од издржување казна затвор лицата Абдуљфета Алими (во траење од 8 месеци), Неџмедин Матоши (4 месеци) Димитар Мишков (3 месеци) и Џафер Небија (5 месеци).
На прашањата на „360 степени“, првичниот одговор што го добивме вечерва од кабинетот на претседателот Пендаровски е дека помилувањата се спроведени согласно законска процедура и дека сите лица кои се помилувани ги исполнуваат условите за такво нешто.
„Министерството за правда доставува предлози за помилување до Кабинетот на претседателот. Комисијата за помилување, како работно тело на претседателот, ги разгледува и проценува предметите и му доставува предлози на претседателот кои лица да бидат помилувани согласно законските основи. Во однос на помилуваните лица, за кои се објавени одлуките во Службен весник, вклучително и Абдуљфета Алими, се лица кои ги исполнуваат условите и за кои Комисијата дала позитивна препорака“,
одговорија за „360 степени“ од кабинетот на претседателот на државата.
Од достапните информации не може да се донесе заклучок уште колку време Абдуљфета Алими ќе остане во затвор. Тој беше правосилно осуден на 6 години затвор за настаните од 27 април 2017 година затоа што му ги дал клучевите од собраниските врати на Горан Ѓошевски (началник на личното обезбедување на поранешниот собраниски спикер Трајко Вељаноски). Алими, на судењата, тврдеше дека само постапувал по наредба на надредените и дека во моментот кога му ги дал клучевите на Ѓошевски, едната собраниска врата веќе била отворена.
За време на целиот судски процес, поддршка на Алими му даваше Зијадин Села. Лидерот на Алијансата за Албанците, кој беше претепан до бессознание, тврдеше дека Алими му го спасил животот таа вечер.
Ова е прво помилување од страна на претседателот Пендаровски, откако го прескокна традиционалното за Нова Година. Тогаш изби скандал со листата која како предлог претседателот ја добива од Министерството за правда. На таа листа се наоѓаа 48 лица кои ги исполнувале условите, а меѓу звучните имиња беа бизнисменот Сеад Кочан, Александар Василевски-Нинџа, сведок на обвинителството за случувањата на 27 април 2017 година, Бобан Илиќ, осуден за убиството на 4-годишниот Алмир во Куманово.
По реакциите во јавноста, Министерството за правда ја повлече листата иако процедурата е таква што крајниот збор го има претседателот – кого и дали воопшто ќе помилува некого.