Заменик-министерот за правда Агим Нухиу утрово објави дека се оградува од списокот за помилување потпишан од министерот Бојан Маричиќ
Од Министерството за правда за МИА изјавија дека предлог-листите за помилување затвореници за Нова година се неприфатливи за министерот за правда Бојан Маричиќ и тие се повторно вратени до затворските управи на разгледување
Повлечен е списокот на лица предложени за помилување што треба да биде доставен до претседателот на државата Стево Пендаровски, објави на Фејсбук заменик-министерот за правда Агим Нухиу.
„Ја информираме пошироката јавност дека Иницијативите за помилување покренати од Управите на затворите се повлечени од страна на Министерството за правда! За каузата на правдата ние секогаш ќе дејствуваме!“,
напиша Нухиу.
Тој претходно објави дека се оградува од списокот за помилувања на осуденици потпишан од министерот Бојан Маричиќ.
Од Министерството за правда за МИА изјавија дека предлог-листите за помилување затвореници за Нова година се неприфатливи за министерот за правда Бојан Маричиќ и тие се повторно вратени до затворските управи на разгледување.
Подоцна тој тоа го објави и на Фејсбук.
„Со мој потпис списокот го вратив назад кај затворите на уште едно разгледување“, напиша Маричиќ.
Министерот за правда, пак, претходно за „Утрински брифинг“ рече дека тој не дава никакви помилувања и оти ниедно спорно име нема да се најде на листите.
„Министерот за правда не дава никакви помилувања. Ова се специфични помилувања по повод Нова година и листите за делумно скратување на казната ја прават директорите на затворот и се проследува на разгледување. Мислам дека дел од спорните имиња нема ни да се најдат на листите. Значи, предлог листите се од затворите а не од Министерството за правда. Тие листи поминуваат низ четири филтри“,
вели министерот за правда Бојан Маричиќ за „Утрински брифинг“.
Вели дека оваа постапка не е јавна и не се објавува во јавност. – Неблагодарно е да се објавуваат имиња во рана фаза затоа што станува збор за луѓе што се осудени и имаат свои надежи. Ние ќе се погрижиме да не се најде ниедно спорно име на списоците, истакна Маричиќ.
Од Кабинетот на претседателот Стево Пендаровски за МИА потврдија дека Комисијата за помилување ќе ја закаже седницата кога ќе пристигне финалниот список од Министерстовото за правда со предлозите за групното помилување.
„Комисијата за помилување ќе ја закаже седницата кога ќе пристигне финалниот список од Министерстовото за правда со предлозите за групното помилување. Јавноста како и секогаш ќе ја информираме веднаш кога ќе се донесат одлуките“,
велат од Кабинетот на Пендаровски.
Вчера Алсат-М објави список на кој се наоѓаат 48 лица за помилување од издржување на дел од затворската казна или за целосно помилување како предлог кој Министерството за правда ќе го испрати до претседателот на државата. Меѓу имињата се и бизнисменот Сеат Кочан, Александар Василевски-Нинџа, сведок на обвинителството за случувањата на 27 април 2017 година, Бобан Илиќ, осуден за убиството на 4-годишниот Алмир во Куманово…