Амбасадорката на САД Анџела Прајс Агелер, се заблагодари за срдечното добредојде и му го предаде акредитивното писмо на претседателот Пендаровски, порачувајќи оти САД ќе направат сè што е во нивна моќ за надминување на предизвиците со кои се соочуваат Северна Македонија и нејзините граѓани
Претседателот Стево Пендаровски денеска ги прими акредитивните писма на новоименуваната амбасадорка на Соединетите Американски Држави во земјава, Анџела Прајс Агелер, порачувајќи оти таа ќе ја ужива неговата и поддршката на целиот негов тим во вршењето на дипломатските должности.
Во обраќањето претседателот истакна дека неколку години наназад политичкиот дијалог меѓу САД и Северна Македонија се одвива на повеќе нивоа, а од особено задоволство е фактот што оваа година е започнат Стратешкиот дијалог, како прва земја од Западен Балкан.
Пендаровски се заблагодари и за досегашната поддршка од САД за започнување на пристапните преговори на земјава со ЕУ, а таквата поддршка, како што кажа, е значајно охрабрување за продолжување и интензивирање на реформскиот процес и за натамошна демократизација на нашето општество.
„Би сакал да истакнам дека Република Северна Македонија во континуитет посветува посебно внимание на развојот на пријателските односи и билатералната соработка со САД, кои ги сметаме за голем пријател, значаен економски партнер и искрен поддржувач во најтешките моменти уште од нашата независност. Впрочем, постојаното унапредување на нашите односи е надворешно политичка аксиома, која е приоритет на сите релевантни политички фактори во Северна Македонија“,
истакна Пендаровски.
Амбасадорката на САД, пак, се заблагодари за срдечното добредојде и му го предаде акредитивното писмо на претседателот Пендаровски, порачувајќи оти САД ќе направат сè што е во нивна моќ за надминување на предизвиците со кои се соочува Северна Македонија и нејзините граѓани.
„Иднината е навистина светла, и покрај тоа што земјата се соочува со стари и со нови предизвици. Господине Претседател, денес сум овде да ветам дека нема сами да се соочите со тие предизвици. САД, Амбасадата на САД и јас ќе сториме сè што е во наша моќ да им помогнеме на луѓето во Северна Македонија да успеат да ги прифатат и да ги надминат сите тие предизвици. Ви го давам мојот личен завет дека ќе стоиме рамо до рамо со луѓето на оваа земја, така како што земјата ги остварува своите цели за мир, просперитет, безбедност и независност за сите свои граѓани“,
посочи Анџела Прајс Агелер.
Таа додаде оти Соединетите Американски Држави ќе бидат покрај Северна Македонија како партнер, сојузник и пријател, негувајќи односи, што ќе стануваат сè посилни, подлабоки и попродуктивни.