Претседателот Стево Пендаровски денеска ги прими акредитивните писма на новоименуваните амбасадори во земјава на Република Молдавија, Анатол Чебу и на Чешката Република, Јарослав Лудва.
На средбата со амбасадорот на Чешка во земјава, Јарослав Лудва, претседателот Пендаровски изрази уверување дека на поддршката на Чешката Република за нашиот евроинтегративен процес може да сметаме и во иднина, особено за време на чешкото претседателство со Советот на Европската Унија во втората половина од оваа година.
Чешкиот амбасадор во земјава, Јарослав Лудва, пак, нагласи дека билатералните односи и соработка се одлични, а Северна Македонија е ценет пријател и важен НАТО-партнер и додаде оти Чешката Република била, е и секогаш ќе биде истраен и силен поддржувач на амбициите на Северна Македонија да стане членка на ЕУ.
На средбата со амбасадорот на Молдавија во земјава, Анатол Чебу, Пендаровски ги нагласи пријателските односи меѓу двете земји и интересот за соработка во делот на евроинтегративните процеси и остварување на европските аспирации за полноправно членство во Европската Унија, како стратегиски приоритети на нашите земји.
„Нашите очекувања се насочени кон одржување на првата Меѓувладина конференција што ќе го означи и официјалниот почеток на пристапните преговори на Република Северна Македонија со Европската Унија, со што ќе имаме можност да ја потврдиме нашата подготвеност за придвижување кон европската интеграција“,
рече претседателот Пендаровски.
Пендаровски истакна дека Северна Македонија ќе биде активно вклучена во работата на тројката која претседава со Организацијата за безбедност и соработка на Европа, а веќе во 2023 година го презема претседавањето со оваа организација.
Молдавскиот амбасадор во земјава, пак, истакна дека двете земји имаат одлични политички односи, додавајќи дека Молдавија е особено заинтересирана за македонското искуство во развивање на економските односи, привлекување инвестиции и промовирање на извозот.