Претходниот рекорд во Кина беше 50,3 степени, измерен во 2015 година
Покрај Европа и САД, и азискиот континент деновиве е погоден од летните горештини, а вчера во кинескиот град Санбао беше измерена рекордна температура.
Градот се наоѓа во провинцијата Синџијан на северозападот на Кина, каде што вчера температурата била 52,2 Целзиусови степени.
Според извештаите, се очекува рекордната жештина да трае уште најмалку пет дена.
Претходниот рекорд од 50,3 Целзиусови степени беше измерен во 2015 година во близина на Ајдинг, во Синџијанг.
Рекордно високите температури со кои се справува Кина изминатиов период предизвикаа проблеми со снабдувањето со електрична енергија и земјоделските култури. Се стравува и од повторување на минатогодишната суша, која ова лето се заканува да биде и најлоша во последните 60 години.
Горештините не попуштаат ниту во САД. Од Флорида преку Тексас до Калифорнија, голем дел од југот вчера беше погоден од топлотен бран што синоптичарите го опишаа како „задушувачки“.
Во познатата Долина на Смртта, во Калифорнија, во сабота навечер беа измерени дури 51 Целзиусов степен, а се очекува температурата да достигне дури 54 степени.
Покрај високите температури, Калифорнија ја зафатија и големи пожари кои досега изгореа над 1 214 хектари, а жителите се евакуирани.
Високи температури бележат и европските земји, меѓу кои и нашата држава. Северна Македонија се наоѓа во портокалова фаза која се очекува да се задржи и наредните десетина дена, а температурите на некои места да бидат над 40 степени.