Министерот за земјоделство, шумарство и водостопанство, Љупчо Николовски очекува минималната откупна цена на пченицата да биде 20 денари. Според него, цените за откуп на јачменот се добри ќе се рефлектираат и врз производството на лебното жито.
„Како што имаме рекордна заинтересираност за мерките за земјоделство, како што имаме рекордна цена, еве тоа и земјоделците ќе го кажат, на јачменот од 17 денари јас очекувам минимална цена 20 денари на пченицата нормално да биде. Односно информациите коишто се од самите разговори коишто ги имаме потврдуваат дека 19-20 денари ќе биде токму таа пченица која што нема доволен соодветен квалитет, а дури пченицата со висок квалитет може да надмине и 22 денари. Се зависи од квалитетот и затоа велиме дека навремено презедовме мерки, навремено излеговме со мерки за поддршка на вештачко ѓубриво, знаејќи го растот на сите цени на репроматеријалите, 40 отсто поддршка од државата“,
вели Николовски.
Николовски рече дека има 7. 000 апликации од земјоделците коишто на неделна основа добиваат поврат на средства за набавеното вештачко ѓубриво. Поради оваа и другите владини мерки очекува зголемување на домашното производство на житни култури.
„Гледате дека никој не негира дека е добра цената на јачменот. Истото задоволство очекувам да го видам кај земјоделците и во делот на пченицата заради тоа што само така ќе ги мотивираме да продолжат и следната година и следната есенска сеидба да инвестираат, да работат, да ги користат мерките и да ги мотивираме, а крајната цел како држава да ја оствариме, која што ја зацртавме – за три години 30 000 тони поголемо производство на пченица и за пет години целосно увозна независност и од пченицата. Станавме земја која што е целосно увозно независна од јачменот. Ако пред три години имавме огромен или голем дел од јачменот се задоволуваше со увоз, последнава година бројките покажуваат дека имаме извоз од 17 илјади тони и увоз на јачмен којшто е 10 пати помал, односно само 950 тони,
порача министерот за земјоделство.
На прашањето дали се зголемени површините под сончоглед, Николовски одговори дека новите мерки и субвенции ќе придонесат за зголемување на површините.
„Очекувам над 10 илјади тони производство на сончоглед и континуираност на тие политики во наредните години, односно навистина да го враќаме сончогледот во македонските ниви, да го гледаме насекаде и да го направиме тоа што било и пред 20 и 30 години. Меѓутоа за прва година во која што го врзуваме производството на сончоглед односно субвенциите за сончогледот под површина да бидат врзани со обврската на производителите да го предадат во преработувачките капацитети како и исто така мотивирачката субвенција од 5.760 денари ако направат принос од 2,5 тони кај сончогледот по информациите коишто ги имаме од нашите сектори, по информациите коишто ги имаме од откупувачите, преработувачите, тие се неколку сите потврдуваат дека оваа година очекуваат меѓу 8 и 10 илјади тони и дуплирани површини не само тука,
рече министерот.