Пазарниот инспекторат апелира до трговците да ги приспособат цените со стандардот на граѓаните, ќе се казнуваат нечесните трговски практики

„Никој не е над законот, а оној кој ќе применува нечесни трговски практики и ќе ги прекрши законите, ќе биде санкциониран, а во зависност од сторениот прекршок, заклучно со денес, постои можност и за затворање на објекти за вршење дејност на определен временски период“, велат оттаму

Државниот пазарен инспекторат денеска најави дека нема да го чека утрешниот ден, односно целосното завршување на одлуките за мерката гарантирана цена, туку како и досега, во континуитет ќе излезат на терен и ќе извршуваат надзори во сите големи маркети во Република Северна Македонија, согласно сите закони по кои постапува оваа институција. Ова денеска го соопшти директорот на Државниот пазарен инспекторат, Горан Трајковски, истовремено апелирајќи и до трговците на мало, но и до трговците на големо, да бидат општествено одговорни и, како што вели, да ги приспособат цените во согласност со стандардот на граѓаните.

„Во изминатиот период, пазарниот инспекторат беше на ниво на својата задача и во интерес на сите засегнати страни, а најмногу во интерес на граѓаните, постапувавме и не дозволивме никој да применува нечесни трговски практики, а со тоа и да не ги почитува антикризните мерки донесени од страна на Владата. Вака ќе продолжиме да постапуваме и во иднина, а секое постапување спротивно од законите кои се во наша надлежност ќе биде казнето“,

рече Трајковски.

Според него, Пазарниот инспекторат при надзорите ќе опфати поширок обем на закони за постапување, како што се Законот за заштита на потрошувачите, Законот за трговија, Законот за забрана и спречување на вршење на нерегистрирана дејност, Закон за инспекциски надзор, Закон за државен пазарен инспекторат итн.

„Никој не е над законот, а оној кој ќе применува нечесни трговски практики и ќе ги прекрши законите, ќе биде санкциониран, а во зависност од сторениот прекршок, заклучно со денес, постои можност и за затворање на објекти за вршење дејност на определен временски период“,

вели тој.

Рендевска: Инспекторите и понатаму ќе ги следат цените, очекуваме маркетите да бидат во функција на граѓаните

Претседателката на Инспекцискиот совет, Даниела Рендевска денеска рече дека Државниот пазарен инспекторат изминатиот период бил активно на терен и тоа најдобро можеле да го почувствуваат граѓаните, бидејќи, како што посочи таа, постојано ги контролирал гарантираните цени.

„Во очекување сме на донесувањето на системско решение на Закон за забрана на нефер трговски практики, особено во трговија со прехранбени и земјоделски производи. Секако инспекторите од пазарниот инспекторат и понатаму будно ќе ја следат ситуацијата на терен и се надеваме дека и субјектите на надзор, односно маркетите ќе бидат во функција на граѓаните“,

рече Рендевска.

Инспекторите од петок на терен, ќе се контролира дали ќе се зголемат досегашните гарантирани цени на производите

Мерката за гарантирана цена на дел од прехранбените производи, како лебот, млекото, јогуртот, тестенините, дел од месните производи, како и на безалкохолните пијалаци и пивото од утре нема да важи.

Истекува и рокот на владината одлука со која беа намалени увозните давачки за зеленчукот.

Институциите најавуваат засилени контроли за да се интервенира во случај на драстично поскапување на производите, со оглед дека законот за нефер трговски практики, со кој се очекува да се амортизира состојбата, сè уште не е изгласан.