Иако спикерот Џафери објасни дека пауза не се предвидува на седница за пратенички прашања, под притисок на пратениците од коалицијата Алијанса за Албанците и Алтернатива дека ќе ја блокираат говорницата, сепак се согласи на едночасовен одложен почеток
Собраниската седница за пратенички прашања треба да продолжи во 13 часот, откако беше прекината уште на самиот почеток по барање на пратеникот Скендер Реџепи од коалицијата „Алијанса за Албанците/Алтернатива“, кој имаше забелешка на редоследот на пратеници кои треба да поставуваат пратенички прашања.
Тој го обвини претседателот на Собранието Талат Џафери дека ја блокира албанската опозиција и побара еден час пауза.
„Претседателот на Собранието цело време е портпарол на ДУИ и врши блокада на опозицијата. Претседателот на Собранието треба да биде непристрасен, еднаков за сите пратеници и пратенички групи. Не случајно го информиравме дека денеска пратенички прашања ќе постави претседателот на Алијанса и тој е ставен петти да зборува. Јас, како координатор на пратеничката група, сум ставен 13-ти. Нели е ова навредливо – претседател на политичка партија да биде петти“,
рече Реџепи.
Џафери ги отфрли обвинувањата и објасни дека списокот е надлежност на претседателот на законодавниот дом составен врз основа на списоците од пратеничките групи.
Тој, исто така, прво не сакаше да даде пауза, со објаснување дека не е предвидено такво нешто на седница за пратенички прашања, но по инсистирањето на Реџепи, кој заедно со останатите пратеници од Алијансата за Албанците и Алтернатива излезе на говорница и најави дека ќе ја блокира работата на парламентот, сепак даде пауза од еден час.