Од владејачката ВМРО-ДПМНЕ велат дека актуелниот шеф на ОЈО ГОКК, Ислам Абази, пред заминување од функцијата го заокружил своето работење за СДСМ и ДУИ и го спасил Венко Филипче од одговорност за случајот со модуларната болница во Тетово
Од СДСМ истакнуваат дека во изминатите пет години ниту партијата ниту Филипче не вршеле притисок врз Јавното обвинителство и ја почитувале независноста на правосудните органи
Одлуката на Основното јавно обвинителство за гонење организиран криминал и корупција (ОЈО ГОКК) да го затвори предметот за набавката и изградбата на 19-те монтажни болници поставени за време на ковид-кризата, без да гони некое физичко или правно лице и денеска е тема за меѓупартиска преписка на ВМРО-ДПМНЕ и СДСМ.
Од владејачката ВМРО-ДПМНЕ велат дека актуелниот шеф на ОЈО ГОКК, Ислам Абази, пред заминување од функцијата го заокружил своето работење за СДСМ и ДУИ и го спасил Венко Филипче од одговорност за случајот со модуларната болница во Тетово.
Според партијата, тогашната влада на СДСМ и ДУИ по итна постапка го изменила Законот за градење за модуларните болници да се третираат како „урбана опрема“, со што овозможила Министерството за здравство самостојно да издава одобренија.
Оттаму додаваат дека за време на ковид-кризата болниците биле набавени како стоки, кои не можеле да бидат користени како објекти за здравствена дејност. Техничката спецификација, пак, била изготвена од лице назначено директно од Венко Филипче.
„Светска банка барала одобренија за поставување и употреба на модуларните болници, како и извод од Катастар, со цел да се покаже одржливоста на проектот. Но, одобрение не можела да издаде ниту општината, ниту Министерството за транспорт и врски, затоа што процедурата не била запазена. Катастар одбивал да врши упис на болниците, затоа што тие биле набавени како стоки и немало извештај од надзор, согласно член 74 од Законот за градење, кој бил потребен за нивно запишување“,
се додава во соопштението.
Од партијата додаваат и дека во случајот со модуларната болница во Тетово, Артан Етеми, тогашен економски директор на болницата, бил против поставувањето на ваков тип објект затоа што немало приклучоци, немало никаков надзор, а немале ниту достапни средства за да ги платат приклучоците.
„Но, Венко Филипче сепак одлучил модуларните болници да бидат пуштени во употреба. Токму поради ова, обвинетите кажаа дека Венко Филипче треба да седи на обвинителната клупа заедно со нив“,
велат од ВМРО-ДПМНЕ.
Социјалдемократскиот сојуз на Македонија (СДСМ) веднаш излезе со демант, нагласувајќи дека одлуката на Обвинителството ги потонала сите лаги на Христијан Мицкоски и ВМРО-ДПМНЕ.
Кети Штерјова на прес-конфреренција, упати критики до владејачката ВМРО-ДПМНЕ и премиерот Христијан Мицкоски, обвинувајќи ги за петгодишен политички линч врз претседателот на партијата, Венко Филипче.
„Пет години шират лаги, конструкции, клеветат, само за пресметка со претседателот на СДСМ, Венко Филипче“,
рече Штерјова.
Од СДСМ истакнуваат дека во изминатите пет години ниту партијата ниту Филипче не вршеле притисок врз Јавното обвинителство и ја почитувале независноста на правосудните органи.
Таа и денеска повтори дека модуларните болници биле набавени преку строги механизми на Светската банка во ек на најголемата здравствена криза, со единствена цел да се спасуваат животи кога болничките капацитети биле преполни.
Штерјова кажа дека по две години на власт и со сите расположливи државни механизми, ВМРО-ДПМНЕ не успеале да докажат никаква неправилност.
Од СДСМ велат дека по пет години лаги, најмалку што можат да направат Мицкоски и ВМРО-ДПМНЕ е јавно да се извинат на семејствата на загинатите чии болка и трагедија безмилосно ги користеле за дневнополитички поени.