Полицијата информираше дека од угостителски објект приведени се 18 лица за непочитување на мерките за заштита
Во текот на вчерашниот ден при контрола на Државниот пазарен инспекторат и полицијата во угостителски објект приведени биле новинарите Миленко Неделковски, Александар Митовски (Инфомакс), но и претседателот на Патриотскиот институт на ВМРО-ДПМНЕ, Александар Пандов.
Според официјалните информации на Министерството за внатрешни работи приведени се 18 лица затекнати во угостителски објект во Стајковци поради непочитување на мерките за заштита.
Пандов за „360 степени“ потврди дека вчера заедно со Неделковски и Митовски биле на прослава по повод пензионирањето на Неделковски. Според него, во 21:25 часот тие веќе заминувале од локалот, но ги пресретнала полицијата и ги повикала да дадат изјави во полициската станица во Гази Баба.
„Точно е дека јас и мојата партнерка бевме во локалот по повод пензионирањето на Неделковски. Јас на себе немав часовник, но мислам дека беше околу 21:25 часот или можеби и 21:30 часот и веќе бевме надвор пред локалот кога полицијата нè повика да отидеме да дадеме изјава. Беа сосема коректни во односот, ние отидовме дадовме изјава и тоа беше тоа. Јас првпат влегувам во полициска станица, претходно сум немал вакво искуство“,
ни изјави телефонски Пандов.
Од СВР-Скопје за овој настан извествуаат дека на 26 февруари во 22:00 часот кај нив било пријавено дека угостителски објект на ул. „6“ во с. Стајковци, сопственост на С.П. и А.П. (52), работи и во него има гости.
„Полициски службеници во содејство со Државен пазарен инспекторат извршиле контрола при што во објектот биле затекнати 18 лица. Тие се приведени во полициска станица Гази Баба за понатамошна постапка, поради непочитување на мерките за заштита на здравјето од ковид-19“,
соопшти СВР Скопје.
По документирање на случајот против нив ќе бидат поднесени соодветни поднесоци.