Намалувањето на затворската популација, како што изјави Пандов, може да се направи на три начини, односно преку условен отпуст, електронски надзор и подобра ресоцијализација на осудениците, затоа што 60 проценти се рецидивисти (повратници)
Еден затвореник во моментов ја чини државата над 10 000 евра на годишно ниво, а некаде и до 15 илјади евра во зависност за која казнено-поправна установа станува збор, изјави денеска в.д. директорот на Управата за извршување санкции, Александар Пандов.
Во моментов во земјава има 2 400, а уште толку чекаат да влезат во затвор на издржување на казната на која се осудени.
Одговарајќи на новинарски прашања пред почетокот на денешната работилница со работен наслов „Предизвици во надминување на затворската пренатрупаност – Условен отпуст, електронски надзор и третманот во функција на успешна ресоцијализација и реинтеграција на осудените лица“, Пандов рече дека во моментов има околу 400 затвореници кои имаат А-третман во казнено-поправните установи во земјава, од кои над стотина користат отсуство и се работно ангажирани.
Намалувањето на затворската популација, како што изјави Пандов, може да се направи на три начини, односно преку условен отпуст, електронски надзор и подобра ресоцијализација на осудениците, затоа што 60 проценти се рецидивисти (повратници).
„Ако гледаме третмански во затворите во моментов има околу 400 затвореници кои се со А-третман, што ќе рече одреден дел од нив над стотина излегуваат секојдневно од 7 или 8 часот наутро, зависи каков им е работниот договор до 16 до 17 часот попладне. Ако тие веќе така можат да излегуваат и да ги повторуваат своите кривични дела, зошто не направиме да тие луѓе едноставно имаат условен прекин на нивната казна. Секако кога би се изрекувале условни прекини, кога би се изрекувале и тоа ќе зборуваме околу алките оние коишто веќе 10 години се чекаа да бидат ставени во функција, јас сум оптимист дека ако не до крајот на годината, на самиот почеток на следната година ќе бидат ставени во функција, да бидат изрекувани такви казни и тие луѓе во домашни услови да си ги одлежат нивните казни“,
изјави Пандов.
Во однос на подобрувањето на инфраструктурата на македонските затвори, директорот на Управата за извршување санкции рече дека досега земјава требало да има комплетно нов и „суперсовремен затвор“ во Идризово, но за жал, како што додаде, досега е завршена само првата фаза, во време на претходното владеење на ВМРО-ДПМНЕ.
„До 2023 година требало и втората фаза да биде завршена, а не е, односно не е направено ништо по тоа. Пари има, тој заем е направен уште во 2010/2011 година, меѓутоа за жал парите коишто се сега обезбедени ни се под мораторум“,
рече Пандов.
Во таа насока, тој соопшти дека следната недела, од 7 до 10 октомври во земјава треба да присуствуваат претставници на Организацијата за превенција и борба против тортура за да направат повторна контрола на македонските затвори. Пандов се надева дека по контролата средствата за новиот затвор во Идризово ќе бидат одмрзнати и дека до крајот на мандатот на владата на ВМРО-ДПМНЕ тој ќе биде ставен во функција.
„Јас се надевам и искрено верувам дека во овие три минати месеци колку што, не само јас, туку и новите директори на македонските затвори успеавме да ги подобриме колку-толку работите и дека ќе бидат одмрзнати тие средства и веќе следната година, со Господ напред, ќе започне втората фаза, со самото тоа ние ќе имаме супернов притвор во самиот затвор ‘Идризово’, кој ќе биде главен централен притвор во Македонија со капацитет од над 400 кревети. И би имале современ затворен дел каде што се затвореници кои издржуваат најтешки казни од над 10, 15 години и доживотни казни. Ние имаме 50 доживотни казни затвор во Македонија. И се надевам дека до крајот на мандатот на ВМРО-ДПМНЕ во ‘Идризово’ сето тоа ќе биде изградено и ќе биде ставено во функција“,
изјави директорот на Управата за извршување санкции.