Економското закрепнување почна во мај, откако почнаа да се укинуваат или олеснуваат строгите ограничувачки мерки
Германската економија веројатно ќе го заврши вториот квартал со невиден пад на економските активности поради условите што ги диктира пандемијата на коронавирусот, се наведува во извештајот на германската централна банка – Бундесбанк.
Вториот квартал на 2020 година најверојатно ќе заврши со најголем пад на реалниот бруто-домашен производ од 1970 година, кога германската канцеларија за статистика „Дестатис“ почна квартално да ги објавува податоците за БДП, се наведува во месечниот извештајот на Бундесбанк.
„Дестатис“ в четврток треба да ги објави првичните податоци за БДП во второто тримесечје од годината, а економистите очекуваат падот на економијата да достигне двоцифрени податоци, јавуваат германските медиуми.
Во првиот квартал германската економија забележа пад од 2,2 проценти во однос на претходниот квартал.
Германската економија почна да закрепнува во мај откако почнаа да се укинуваат или олеснуваат строгите ограничувачки мерки наметнати заради пандемијата.
„Економското закрепнување се очекува да продолжи и во втората половина од годинава“, велат економистите од Бундесбанк додавајќи дека за тоа ќе придонесе пакетот државна помош за економијата што неодамна беше усвоен од парламентот.