Судот смета дека постојат околности дека осомничениот може да се даде во бегство, може да ја попречи кривичната постапка со влијание врз сведоците, и околности кои упатуваат дека ќе го доврши или повтори кривичното дело
Љупчо Палевски, првосомничениот за грабнувањата и убиствата на 14-годишната Вања Ѓорчевска и велешанецот Панче Жежовски, попладнево од судија на претходна постапка во Основниот кривичен суд во Скопје доби 30-дневен притвор.
Откако му беше определена мерката пртивор, додека полицијата го спроведуваше Палевски, на излегување од скопскиот Кривичен суд на новинарско прашање зошто се дал во бегство, на видеото на агенцијата МИА, се слуша како тој кратко одговара „не бев во бегство, не смеам да говорам за истрагата“.
Од Основниот кривичен суд Скопје, преку соопштение информираат дека мерката пртвор за Палевски почнува да важи од денот кога тој беше примен во истражниот затвор во Шуто Оризари откако на 15 овој месец беше екстрадиран од Република Турција.
„По признесување на осомничениот во присуство на неговиот бранител, поставен по службена должност, судија на претходна постапка донесе решение со кое на осомничениот му се определува мерка притвор во траење од 30 дена која започнува со нејзино реализирање од денот на неговиот прием во Истражниот затвор Скопје, а заради постоење на околностите од член 165 ст. 1 точка 1,2 и 3 односно, постојат околности дека може да се даде во бегство, може да ја попречи кривичната постапка со влијание врз сведоците, и околности кои упатуваат дека ќе го доврши или повтори кривичното дело“,
се наведува во соопштението од Кривичен.
Од Основниот кривичен суд наведуваат дека против ова решение странките имаат право на жалба пред Кривичниот совет на овој суд.
Палевски беше спроведен во Основниот кривичен суд Скопје каде пред судија на претходна постапка требаше да се произнесе за 30-дневниот притвор кој му беше одреден во отсуство на почетокот на декември, кога Основното јавно обвинителство Скопје отвори истрага за грозоморниот случај.
Станува збор за прво појавување на Палевски пред судските органи во земјава, откако пред една недела беше екстрадиран од Турција.
Палевски во судот беше донесен со силно полициско обезбедување кое во зградата на Кривичен го внесе држејќи му ја главата наведната и со цврст зафат околу неговите раце.
Носењето на Палевски во Кривичниот суд беше очекувано дека ќе се случи оваа недела, откако од Судот минатата недела соопштија дека од истражниот затвор во Шуто Оризари го добиле официјалното известување за неговата екстрадиција. Покрај за екстрадицијата, Судот добил известување и за барањето на Палевски за ангажирање адвокат што ќе го застапува во текот на постапката.
Љупчо Палевски-Палчо на 15 мај, односно минатата среда беше екстрадиран од Турција. Веднаш по доаѓањето во земјава беше спроведен во истражниот затвор „Скопје“ на издржување на мерката притвор што Судот му ја одреди во негово отсуство.