Тоа, според ВМРО-ДПМНЕ, е последица и на отсуството на политики и предлози кои ќе бидат конструктивен фактор во општеството
Падот на Индексот за слобода на медиумите на „Репортери без граници“ според владејачката ВМРО-ДПМНЕ се должи главно на ширење лажни вести и дезинформации.
Во партиското соопштение се вели дека главната фабрика за лажни вести и дезинформации, во отсуство на конструктивни политики, се СДСМ и Венко Филипче, за што, како што велат од ВМРО-ДПМНЕ, како партија имаат и осудителни пресуди за тоа.
Оттаму, како лажна вест го посочуваат последното соопштение и прес-конференција на која од СДСМ рекоа дека во првите четири месеци од годинава, владините функционери потрошиле над 30 илјади евра во скапите скопски ресторани.
„Тие тврдат дека министри давале неколку илјади евра за ручеци, а во суштина и институциите демантираа кажувајќи дека се работи за исплати кон ресторански оператор за услуги за храна кои ги користат и плаќаат вработените од министерствата“,
велат од ВМРО-ДПМНЕ.
Од владејачката партија додаваат дека СДСМ е главниот финансиер и мецена на лажните вести и „тој полусвет кој оваа партија го одржува“.
Тоа, според ВМРО-ДПМНЕ, е последица и на отсуството на политики и предлози кои ќе бидат конструктивен фактор во општеството.
За Извештајот на меѓународната организација „Репортери без граници“, во кој Северна Македонија бележи пад за шест позиции на Индексот за слобода на медиумите за 2025 година, денеска реагираа од СДСМ и од ДУИ.
Во реакцијата од СДСМ се вели дека Извештајот е уште еден алармантен показател за погрешната насока во која оди државата под водство на ВМРО-ДПМНЕ и додадоа дека медиумските слободи не смеат да бидат жртва на „партиските апетити и авторитарните амбиции на ДПМНЕ“.
Од ДУИ оценуваат дека ова е алармантен показател за негативниот тренд во демократското управување и односот кон критичкото мислење во земјата.
Оттаму посочија дека деталната анализа на извештајот открива сериозни слабости кои се движат од политичкиот контекст и правната рамка, па сè до економските притисоци и безбедносната состојба на новинарите.