Денеска инспекторите извршиле над 250 контроли и надзори и биле забележани само две прекршувања на одлуката на Владата и најавуваат дека за тие субјекти ќе бидат издадени соодветни прекршочни платни налози
Овошјето и зеленчукот кои од денеска се продаваат по замрзната цена се достапни во маркетите и продавниците и се продаваат по цена согласно одлуката на Владата од пред два дена, се наведува во соопштението од Државниот пазарен инспекторат.
Оттаму додаваат дека денеска инспекторите извршиле над 250 контроли и надзори и биле забележани само две прекршувања на одлуката на Владата и најавуваат дека за тие субјекти ќе бидат издадени соодветни прекршочни платни налози.
Од ДПИ велат дека инспекторите и натаму ќе бидат на терен и ќе вршат контрола и надзор во почитувањето на одлуката на Владата со која 11 видови овошја и зеленчуци добија замрзнати цени.
Во маркетите и на зелените пазари од денеска доматите треба да се продаваат за најмногу 70 денари. Највисоката цена на свежите краставици ќе биде 75 денари, на кромидот 60, карфиолот 70, пиперките 90 денари. Цената на гравот нема да биде повисока од 75 денари, а на леќата 110 денари. Кај овошјето, бананите ќе треба да бидат со цена од 70 денари, мандарините 60, а највисоката цена на портокалите и лимоните ќе биде 55 денари.
Одлуката на Владата за определување највисоки цени за овие видови овошје и зеленчук ќе трае до 30 април годинава.
Ова е петто замрзнување на цените оваа година. Прво беше замрзната цената на белиот и полубелиот леб на 33 денари. Потоа следуваше замрзнување на цените на млекото и млечните производи, па на оризот и јајцата од кокошка. Пред овошјето и зеленчукот беа замрзнати цените на тоалетната хартија, влажните марамчиња, пелените и хигиенските влошки.