Нашата теза е дека треба ден поскоро да се видиме себеси и волјата да ја вратиме кај народот и народот да одлучи за тоа кој ќе ги претставува бидејќи во моментов не се претставува волјата на граѓаните туку само волјата на интересни групи на неколку политички партии за да спасат кариера, коментира заменик-лидерот на опозициската Беса
Ова е влада на бројки, која политичката сцена ја претвори во пазарџиска тезга, коментира заменик-претседателот на Беса, Арјанит Хоџа, во интервју за „360 степени“ на ТВ Алсат, за реконструкцијата на Владата, за што деновиве расправа Собранието.
„Тие не се борат за да имаат јасна визија како државата да се движи напред, туку борбата на владејачките партии е како да обезбедат некој пратеник плус за да го одржат во живот ова владеење до следните избори. Видете, нема никаква придобивка оваа влада од тоа што го продолжува својот мандат за 10 месеци. Ако оваа влада на новото мнозинство се изгласа после еден или два месеци, зависи од дебатата како се одвива во Собранието, ние автоматски после два месеци влегуваме во летниот период каде нема никаков вид владина активност или важни проекти и се подразбира дека останува од септември до јануари периодот во кој треба да работи оваа влада“,
смета тој.
Хоџа прашува „што може оваа влада, со овие бројки, со оваа деградирана легитимност, со премиер кој не произлегол од изборен циклус, со партии што добиле гласови против визијата на оваа влада“.
„Нема влада која е произлезена од легитимноста на граѓаните и затоа нашата теза е ден поскоро да се видиме себеси и волјата да ја вратиме кај народот и народот да одлучи за тоа кој ќе ги претставува бидејќи во моментов не се претставува волјата на граѓаните, туку само волјата на интересни групи на неколку политички партии за да спасат кариера“,
коментира еден од првенците на Беса.
За очекувањата од ЕУ и од САД дека изборите треба да се одржат во редовниот термин в година, Хоџа смета дека „меѓународните фактори ја користат оваа реторика за да има стабилност“.
„Но, во суштина, оние кои го знаат функционирањето на политичките субјекти, владеењето, јасно им е дека овде веќе нема стабилност, стабилизираме само бројки, а не благосостојба. Ова парламентарно мнозинство ги стабилизира само владините фотелји, а не ја стабилизира иднината на државата. Така што, ние оценуваме дека изборите треба да се одржат за да се забрза нашиот европски пат, бидејќи гледаме дека во последната година и годината што е пред нас е само губење време за државата, бидејќи од ова придобиваат само интереси за тендери, придобиваат само интересни групи, а воопшто не придобива државата“,
вели заменик-лидерот на Беса.