Ова веќе не е инцидент. Ова е системски колапс на институциите под команда на Христијан Мицкоски и организираната криминална група ВМРО. Додека тие отвораат базени, менуваат министри и обвинуваат за ‘дезинформации’, реките се полнат со пена, а граѓаните не смеат да ја пијат водата од чешма, реагира опозициската партија
По загадувањето на водата во повеќе градови, денешното влевање на бела пена од Лепенец во Вардар е показател за системски колапс на институциите под команда на Христијан Мицкоски, обвинуваат од СДСМ.
Оттаму велат дека пената, која личи како да е синтетичка, е видлив доказ за загадувањето.
„Прво загадена вода за пиење во Гостивар, Валандово, Лешок, Крушево и Пласница. Дури и во болница немаше безбедна вода. Сега бела пена тече низ реката Лепенец во Скопје. Пената изгледа како да е синтетичка. Видливиот доказ за загадување што се излива директно во реката, токму таму каде што Лепенец се влева во Вардар. Ова веќе не е инцидент. Ова е системски колапс на институциите под команда на Христијан Мицкоски и организираната криминална група ВМРО. Додека тие отвораат базени, менуваат министри и обвинуваат за ‘дезинформации’, реките се полнат со пена, а граѓаните не смеат да ја пијат водата од чешма“,
велат од СДСМ.
Како што претходно објавивме, од попладнево, бела пена се влева од реката Лепенец во Вардар, а социјалните мрежи се преплавени со фотографии од граѓани кои го забележале тоа. Настанот го потврди и градоначалникот на Град Скопје, Орце Ѓорѓиевски, кој вели дека и тие добиле пријава.
На терен се инспекциските служби на Град Скопје и на ресорното министерство, вели градоначалникот Ѓорѓиевски. По сторителот се трага и со дрон, а екипи на скопски „Водовод“ земаат примероци за да утврдат за каква материја станува збор.