Судскиот совет апелира до Врховниот суд да обезбеди еднаква примена на законите од страна на судовите, а воедно ги осуди изјавите во јавноста со кои се прави поделба на судиите по национална припадност бидејќи тоа само носи штета на угледот на судството и земјата
Како резултат на големата разлика во изречената казна, членовите на Судскиот совет најавија дека по враќањето од годишните одмори ќе го испитаат случајот со изречената пресуда на Апелацискиот суд во Скопје, со која 18-годишната затворска казна за возачот кој под дејство на алкохол, управувајќи со возило усмрти малолетно лице на пешачки премин, е намалена на 8 години.
Оттаму, апелираат и Врховниот суд да обезбеди еднаква примена на законите од страна на судовите преку воедначување на судската пракса, посебно за кривичното дело „тешки дела против безбедноста на луѓето и имотот во сообраќајот“.
„Советот потсетува дека во неколку наврати и писмено побарал од Врховниот суд, заради невооедначеност на пресудите да се преиспита казнената политика, а по претходно направена анализа на судската пракса“,
се вели во соопштението од Судскиот совет.
Апелацискиот суд во Скопје пред два дена ја преиначи првостепената пресуда од Основниот суд во Велес за случајот со прегазувањето и усмртување на малолетното девојче во центарот на Велес, кое се случи минатата година во декември. Казната за возачот Ангелче Николов од изречените 18, Апелација ја намали на осум години затвор. Казната за Николов е намалена за двете дела за кои тој се товареше – тешки дела против безбедноста на луѓето и неукажување помош на лице повредено во сообраќајна незгода.
„Апелацискиот суд ја преиначи првостепената пресуда од Основниот суд во Велес од осумнаесет на осум години затвор. Што се однесува до поднесување на жалба, тоа законски е невозможно, што значи дека оваа одлука на Апелација е финална и правосилна“,
одговорија од велешкиот суд за „360 степени“.
Покрај затворска казна, Николов доби и петгодишна забрана за управување на моторно возило, која ќе биде ефективна од денот на неговото излегување од затвор.
28-годишниот велешанец Ангелче Николов на 17 декември минатата година, возејќи под дејство на алкохол и со неприспособена брзина во строгиот центар на Велес, на улицата „Борис Трајковски“ прегази мајка и нејзината 11-годишна ќерка. Од силината на ударот, малолетното девојче било исфрлено речиси до следниот пешачки премин на улицата и починало, а возачот Николов воопшто не запрел, туку продолжил да вози со голема брзина. Неговиот „мерцедес“ полицијата брзо го пронајде, а Николов самиот се пријави два дена по сообраќајната несреќа.
Инаку, по објавувањето на одлуката на Апелација, беше објавено дека дел од судиите кои одлучувале за овој случај бил и судијата Енвер Беџети, кој во минатото се најде во фокусот на јавноста, обичната и стручната, откако како судија известил дека девет месеци го чуваше предметот за масовното прислушување, популарно наречен „Таргет–Тврдина“, а во кој првообвинет е ексдиректорот на поранешната Управа за безбедност и контраразузнавање. Откако конечно се најде на одлучување, Апелација ја укина првостепената пресуда со која Мијалков беше осуден на 12 години затвор и предметот го врати на повторно судење во Основниот кривичен суд Скопје, кое е во тек.