Во соопштението од денешната владина седница се потврдени информациите на „360 степени“ за разрешувањето на Петровска од ДИЖС, за именувањето на Стојковски за нов директор и за унапредувањето на Ангелов во ЦУК
Денешната владина седница, веројатно, е една од последните пред заминувањето на поголем дел од министрите на одмор, но и пред распишувањето на локалните избори, кога стапуваат на сила и повеќе „забрани“ за институциите
Од Владата ги потврдија информациите на „360 степени“ за разрешувањето на Ана Петровска од директорската позиција во Државниот инспекторат за животна средина, за именувањето на Сретен Стојковски за нов в.д.директор, како и за унапредувањето на Стојанче Ангелов од вршител на должност во директор на Центарот за управување со кризи (ЦУК).
Освен овие кадровски решенија, на денешната владина седница се именувани нови раководители уште на неколку институции:
– Амир Шабани е именуван за директор на Фондот за осигурување на депозити.
– Дритан Имери е именува за заменик-директор на Државниот испитен центар.
– Костадин Ацевски (поранешен пратеник на СДСМ) е разрешен од директор на Управата за хидрометеролошки работи, како што се посочува во владиното соопштение, на негово барање. За нов в.д. директор на УХМР е именуван Агим Муртезани (исто така поранешен пратеник на СДСМ).
„Донесена е одлука за членови на бордот на директори на „Тутунски комбинат“ – Прилеп Владата да ги предложи: Никола Џамбазовски (независен неизвршен член), Миле Велкоски (независен неизвршен член), Кире Станкоски (извршен член), Татјана Стефаноска (извршен член), Ристе Ташев (извршен член)“,
се наведува во соопштението за одлуките што се донесени на денешната седница на Владата.
Денешната владина седница веројатно е една од последните пред заминувањето на поголем дел од министрите на одмор, но и пред распишувањето на локалните избори. Претседателот на Собранието, Талат Џафери, најави дека ќе ги распише изборите на 6 април (задутре),за да се одржат на 17 октомври.
Од датумот на распишување на изборите, почнуваат да течат роковите за спроведување на изборните дејствија. Исто така, Изборниот законик, како и Законот за спречување корупција и судир на интереси, предвидуваат список на „забрани“ за државните институции во периодот од распишување до одржување на изборите. Во тој период, меѓу другото, не смее да почне постапка за вработување на нови лица или за престанок на работен однос во државни и јавни институции, а започнатите постапки се ставаат во мирување, освен во итни случаи.
Владата денеска одлучи и да додели парична награда од по 10 000 денари за вкупно 300 лица, од кои дел пожарникари, а дел граѓани кои помогнаа во гаснењето на шумските пожари што ја зафатија територијата на државата.